At­huga­semd­ir frá Arion banka vegna fjöl­miðlaum­ræðu um 1998 og Haga

Vegna umræðu í fjölmiðlum undanfarna daga um málefni Haga vill Arion banki árétta:

• Stjórn Arion banka ákvað að skrá verslunarfyrirtækið Haga í Kauphöll Íslands og bjóða fjárfestum og almenningi að kaupa hlut bankans í opnu útboði.

• Stjórnendum Haga er gefinn kostur á að kaupa 5% hlut í félaginu og Jóhannesi Jónssyni býðst að kaupa 10% hlut á sama verði og aðrir kaupendur.

• Rekstur Haga gengur vel. Bankinn telur því mikilvægt í söluferlinu að núverandi stjórnendur Haga sinni áfram störfum sínum og lýsi því yfir að þeir hafi áhuga á að gerast hluthafar í fyrirtækinu.

• Hagar er fyrsta fyrirtækið sem tekin er ákvörðun um að skrá á hlutabréfamarkað eftir bankahrunið, en starfhæfur hlutabréfamarkaður er afar mikilvægur fyrir framþróun og endurreisn atvinnulífsins. Skráning á hlutabréfamarkað er einnig besta leiðin til að tryggja dreifða eignaraðild og gagnsæi í rekstri fyrirtækja.

• Strangari reglur um dreifða eignaraðild fyrirtækja sem skráð eru í Kauphöll hafa tekið gildi og fleiri ráðstafanir í sömu átt hafa verið boðaðar. Verulegar líkur eru á frekari takmörkun á eignaraðild einstakra aðila í útboðinu á Högum.

• Stöðugleiki í rekstri Haga er mikilvægur fyrir tilvonandi fjárfesta. Arion banki telur að með fyrirkomulaginu sem nú hefur verið kynnt sé félagið vel í stakk búið að verða að almenningshlutafélagi.

• Bankinn telur mikilvægt að eignarhald á félaginu færist með skjótum hætti til fjárfesta. Það samræmist ekki hlutverki banka að eiga rekstrarfélög til lengri tíma.

• Það er ekki rétt sem haldið hefur verið fram, að Jóhannesi Jónssyni bjóðist að kaupa hlut í Högum, á sama tíma og bankinn afskrifi persónulegar skuldir hans. Engar persónulegar ábyrgðir eru fyrir lánum 1998 ehf. Það fer eftir því hvernig söluferli Haga gengur, hversu mikið bankinn fær upp í skuldir 1998 ehf.

• Þegar sölu Haga lýkur og vitað er hversu mikið fæst upp í skuldir 1998 ehf. mun bankinn ganga eins langt og lög heimila við að innheimta skuldir félagsins. Í því felst að ganga að ábyrgðum sem eru fyrir skuldum.

• Hagar er fjárhagslega heilbrigt fyrirtæki sem hefur staðið við allar skuldbindingar sínar. Umræða um að setja félagið í gjaldþrotameðferð er byggð misskilningi.

• Það er von Arion banka að sem flestir fjárfestar gerist hluthafar í Högum. Bankinn er ekki að hygla einum eða neinum í þessu ferli. Markmið hans er fyrst og fremst að sjá til þess að rekstur Haga verði áfram með þeim myndarlega hætti sem verið hefur. Þannig verða kaup á hlutabréfum í Högum arðbær og góð fjárfesting.