Eignar­hlut­ir Arion banka í fé­lögum í óskyldum rekstri

Arion banki á í dag eignarhluti í 22 félögum í rekstri ótengdum bankaþjónustu. Í öllum tilfellum er um að ræða eignarhluti sem bankinn hefur eignast í kjölfar fjárhagslegrar endurskipulagningar fyrirtækja á undanförnum árum.

Stefna bankans er að eiga ekki eignarhluti í félögum í óskyldum rekstri lengur en nauðsyn krefur. Slíkir eignarhlutir fara því í söluferli og eru seldir um leið og unnt er. Þannig hefur Arion banki selt hlut sinn í fjölmörgum félögum á undanförnum árum, t.d. Högum, 10-11, ÍAV, Heklu, BM Vallá, N1 og Pennanum.

Af þeim 22 félögum sem bankinn á í dag eignarhluti í eru sjö félög sem eru ekki með neina starfsemi. Unnið er að slitum þeirra en það ferli getur tekið allt upp í þrjú ár. Tvö af félögunum eru verðbréfasjóðir sem ekki hafa með höndum neina eiginlega starfsemi, hafa aðeins fjárfest í erlendum verðbréfasjóðum og er eignarhlutur bankans í þeim frá 23-24%. Eftir standa þrettán félög í óskyldum rekstri sem bankinn á meira en 10% hlut í.

Félag

Landfestar ehf (100%)

Yfirstandandi eru viðræður um mögulegan samruna við Eik fasteignafélag hf. Meðal þess sem er verið að skoða er hugsanleg skráning hlutafjár hins sameinaða félags í kauphöll.

Landey ehf. (100%)

Eignarhlutur bankans er til sölu og geta áhugasamir fjárfestar haft samband við Fyrirtækjaráðgjöf Arion banka eða framkvæmdastjóra Landeyjar.

Reitir fasteignafélag hf. (43%)

Unnið er að því að ljúka endurfjármögnun Reita fasteignafélags hf. og er vonast til að henni verði lokið fyrir árslok 2013. Horft er til þess að skrá hlutafé félagsins á Aðalmarkað Nasdaq OMX Iceland hf. vorið 2014.

SMI ehf. (39%)

Í tengslum við fyrirhuguð kaup Eikar fasteignafélags hf. á stærstum hluta eigna SMI ehf. mun bankinn losa um eignarhlut sinn í SMI ehf.

Klakki ehf. (32%)

Unnið er að sölu undirliggjandi eigna Klakka ehf. Þar er stærst um 31% eignarhlutur í Vátryggingarfélagi Íslands hf. en söluhömlur eru á þeim hlut fram í apríl á næsta ári.

Stoðir hf. (16%)

Stærsta eign Stoða hf. er um 29% eignarhlutur í erlenda drykkjarframleiðandanum Refresco Gerber. Auk þess á félagið um 5,5% eignarhlut í Tryggingamiðstöðinni hf. Félagið vinnur að sölu undirliggjandi eigna.

BG12 slhf. (62%)

Félagið var stofnað af Arion banka og nokkrum lífeyrissjóðum og fjárfestingarsjóðum utan um 46% eignarhlut í erlenda matvælaframleiðandanum Bakkavor Group Ltd. Til stendur að selja undirliggjandi eign félagsins á næstu misserum.

GO fjárfesting ehf. (30%)

Félagið heldur utan um rekstur Flúðasveppa og reiknað er með að hluturinn verði seldur til meðeiganda bankans í félaginu.

EAB 1 ehf. (30%)

Eina eign félagsins er um 3,5% eignarhlutur í erlenda drykkjarframleiðandanum Refresco Gerber.

Skipti hf. (38%)

Bankinn eignaðist hlutinn um mitt þetta ár í tengslum við endurskipulagningu félagsins og er stefnt að skráningu félagsins á Aðalmarkað Nasdaq OMX Iceland hf. árið 2014.

HB Grandi hf. (33%)

Tilkynnt hefur verið um fyrirhugaða skráningu félagsins á Aðalmarkað Nasdaq OMX Iceland hf. Bankinn hyggst selja stærstan hluta af eign sinni í aðdraganda skráningar.

Farice ehf. (39%)

Hlutur bankans í Farice ehf. er til sölu og geta áhugasamir fjárfestar haft samband við Fyrirtækjaráðgjöf Arion banka.

Sementsverksmiðjan ehf. (24%)

Unnið er að því að ljúka aðkomu bankans að eignarhaldi Sementsverksmiðjunnar ehf. og reiknað er með að niðurstaða fáist fyrir lok ársins.

Að auki á Arion banki fullnustueignir, t.d. fasteignir og lóðir, sem í sumum tilfellum eru vistaðar í sérstökum félögum. Slíkar eignir eru einnig seldar eins fljótt og auðið er og er umsjón með sölunni í höndum fasteignasala eða fullnustudeildar bankans.

Líkt og að ofan greinir er unnið að undirbúningi á sölu á þeim eignum sem unnt er að selja og er sú vinna komin langt á veg í mörgum tilfellum. Önnur félög stefna að því að selja undirliggjandi eignir sínar og ljúka þannig starfsemi sinni eða bíða lausnar á sérstökum úrlausnarefnum sem eru ekki á færi bankans eins að leysa.

Samkvæmt framangreindum fyrirætlunum mun eignarhlutum bankans í fyrirtækjum í óskyldum rekstri fækka enn frekar. Bankinn hefur jafnframt viljað stuðla að uppbyggingu hlutabréfamarkaðar hér á landi og eru fyrirhugaðar skráningar félaga á borð við HB Granda hf., Skipti hf. og Reitir fasteignafélag hf. á Aðalmarkað Nasdaq OMX Iceland hf. mikilvægur liður í því.