Enn fleiri starfs­menn bæt­ast í hóp vott­aðra fjármála­ráð­gjafa

Fimmtudaginn 21. maí útskrifuðust 40 starfsmenn fjármálafyrirtækja úr námi til vottunar fjármálaráðgjafa, þar af 19 frá Arion banka. Eftir útskriftina hafa 54 starfsmenn bankans lokið náminu.

Markmið vottunarinnar er að samræma þær kröfur sem eru gerðar til fjármálaráðgjafa og tryggja að þeir búi yfir nauðsynlegri þekkingu og færni í starfi. Námið spannar þætti fjármálamarkaðar og þjóðhagfræði auk lögfræði og siðfræði. Einnig fengu nemendur þjálfun í almennri ráðgjafafærni. Náminu lauk með prófum til að staðfesta færni þátttakenda.

Samtök fjármálafyrirtækja standa að verkefninu um vottun fjármálaráðgjafa ásamt fjármálaráðuneytinu, Samtökum starfsfólks fjármálafyrirtækja, Háskóla Íslands, Háskólanum í Reykjavík og Háskólanum á Bifröst.