Ertu til þeg­ar á reyn­ir?

Rauði kross Íslands blæs í lúðra og kynnir innanlandsverkefni félagsins undir yfirskriftinni Ertu til þegar á reynir? vikuna 12.-17. október. Í þessari viku verður safnað sjálfboðaliðum/LIÐSAUKUM til að taka þátt í viðbröðum félagsins við neyð. Óskað er eftir fólki sem er reiðubúið að aðstoða á tímum áfalla þegar tafarlaust getur reynst þörf á að kalla út sjálfboðaliða til að rétta þolendum hjálparhönd.

Nýja Kaupþing styður þetta átak Rauða krossins, en ekki eingöngu með peningastyrk heldur hafa nú á annað hundrað starfsmenn þegar látið skrá sig í LIÐSAUKA.

Þessi LIÐSAUKI Rauða krossins er eins konar varalið sem kallað er út við margvíslegar aðstæður, allt frá náttúruhamförum til persónubundinna áfalla. Þetta er kjörið fyrir fólk sem ekki hefur tíma til að binda sig í einstökum verkefnum Rauða krossins, en vill gefa kost á sér til nýta reynslu sína og þekkingu þegar mikið liggur við. LIÐSAUKINN er viðbót við þá hundruð sérþjálfuðu sjálfboðaliða Rauða krossins sem eru tilbúnir að tryggja velferð almennings.

Leitað er eftir fólki með margvíslegan bakgrunn því verkefnin eru jafn fjölbreytt og aðstæðurnar sem við lendum í. Hlutverk sjálfboðaliða í LIÐSAUKA getur til dæmis verið símsvörun, túlkun af erlendum tungumálum, þýðingar, barnapössun, skráning, matreiðsla, eða sálrænn stuðningur – og margvísleg verkefni í Rauðakrosshúsinu sem er miðstöð fyrir fólk sem orðið hefur fyrir áföllum í kjölfar efnahagshrunsins. Nánari upplýsingar fást á www.redcross.is.