Félags­stofn­un stúd­enta flyt­ur banka­viðskipti sín til Arion banka

Félagsstofnun stúdenta hefur flutt bankaviðskipti sín til Arion banka og var nýverið undirritaður samstarfssamningur þess efnis. Samningurinn tekur til almennrar viðskiptabankaþjónustu, framkvæmdafjármögnunar, einkabankaþjónustu og margs konar markaðssamstarfs. Mun bankinn meðal annars verða bakhjarl fjölbreyttra viðburða á vegum Félagsstofnunar stúdenta fyrir stúdenta við Háskóla Íslands.

Félagsstofnun stúdenta tók ákvörðun um að flytja viðskipti sín til Arion banka að loknu tilboðsferli þar sem Arion banki bauð hagstæðustu kjörin.

Guðrún Björnsdóttir, framkvæmdastjóri Félagsstofnunar stúdenta:

„Rekstur Félagsstofnunar stúdenta er nokkuð umfangsmikill. Töluverð uppbygging hefur átt sér stað á síðustu árum og er stefna okkar að halda henni áfram enda ljóst að þörfin er fyrir hendi. Í dag rekum við Stúdentagarða, Bóksölu stúdenta, Bókakaffi stúdenta, Leikskóla stúdenta, Kaffistofur stúdenta, Hámu og Stúdentakjallarann. Markmið okkar er að bjóða stúdentum við Háskóla Íslands góða þjónustu á góðum kjörum og tryggja öruggan rekstrargrundvöll stofnunarinnar. Góð kjör á allri fjármálaþjónustu og góður samstarfsaðili á sviði bankaviðskipta er mikilvæg forsenda í öllu okkar starfi. Það er ánægjulegt að finna fyrir þeim áhuga sem Arion banki sýnir starfsemi okkar og finna fyrir vilja innan bankans til að taka þátt í ýmsum verkefnum okkar sem ná út fyrir hefðbundin bankaviðskipti.“

Höskuldur H. Ólafsson, bankastjóri Arion banka:

„Það er ekki annað hægt en að dást að því mikla starfi sem Félagsstofnun stúdenta hefur áorkað á undanförnum árum og þeirri miklu uppbyggingu sem átt hefur sér stað innan háskólasamfélagsins. Það eru ekki síður spennandi tímar framundan hjá Félagsstofnun stúdenta og okkur mikil ánægja að vera samstarfsaðili FS í þeim verkefnum sem framundan eru.“

Meðfylgjandi er mynd sem tekin var við undirritun samstarfssamningsins í Stúdentakjallaranum.