22.06.2009
Ferðafélag barnanna stofnað í dag
Það tók undir í hlíðum Esjunnar þegar 50 leikskólabörn sungu þar á stofnfundi Ferðafélags barnanna sem Ferðafélag Íslands stofnaði í dag. Aðalbakhjarl hins nýja félags er Nýja Kaupþing. Leikskólabörnin gengu upp á stöð 3 á Esjunni og fengu bakpoka, handklæði og pennaveski frá bankanum að því loknu.
Markmið Ferðafélags barnanna er að fá börn á aldrinum 0-12 ára til að upplifa töfra náttúrunnar. Boðið verður uppá margskonar ferðir og uppákomur sem verða sniðnar að þörfum barnanna. Má þar nefna styttri fjöru- og fjallaferðir fyrir yngstu börnin, ratleiki í náttúrunni fyrir börn á aldrinum 6- 9 ára og dagsferðir í Þórsmörk eða Landmannalaugum fyrir börn á aldrinum 10-12 ára.
Ferðafélagi barnanna er ætlað að stuðla að aukinni samveru fjölskyldunnar og heilsu- og náttúruvernd.
Þann 18. júlí mun Ferðafélagið halda uppá ,,Heiðmerkurdag" þar sem markmiðið er að kynna Heiðmörkina sem vin innan höfuðborgarinnar. Á þeim degi verður Ferðafélag barnanna í hávegum og verða ýmsar uppákomur haldnar fyrir börnin í tilefni að því.
Leikskólabörnin tóku lagið eftir að Ólafur Örn Haraldsson forseti Ferðafélags Íslands og Helga Þóra Eiðsdóttir forstöðumaður markaðsdeildar undirrituðu samstarfssamning um Ferðafélag barnanna.
Deila grein:
