Fjárhags­legri endur­skipulagningu Ölgerðar­innar lokið

Arion banki hefur í samstarfi við Auði Capital og Ölgerðina lokið fjárhagslegri endurskipulagningu Ölgerðarinnar. Hluti af endurskipulagningunni er fjárfesting Auðar I fagfjárfestasjóðs og meðfjárfesta í Ölgerðinni. Fjárfestar leggja þannig til nýtt hlutafé og eignast fyrir vikið 36% hlut í félaginu. Arion banki eignast 20% hlut við skuldbreytingu. Meirihluti Ölgerðarinnar er því kominn í hendur nýrra hluthafa.

Aðrir hluthafar eru OA ehf., félag Andra Þórs Guðmundssonar forstjóra og Októ Einarssonar stjórnarformanns, og F-13 sem er félag í eigu fjögurra framkvæmdastjóra Ölgerðarinnar.
Ráðist var í fjárhagslega endurskipulagningu Ölgerðarinnar þar sem eiginfjárstaða félagsins var orðin neikvæð, sökum umtalsverðrar hækkunar höfuðstóls erlendra lána. Þrátt fyrir þunga greiðslubyrði félagsins var Ölgerðin í skilum með öll sín lán.

Arion banki leitast við með fjárhagslegri endurskipulagningu að hámarka endurheimtur sínar og fór endurskipulagningin fram samkvæmt verklagsreglum bankans, sem m.a. kveða á um að stefnt skuli að endurskipulagningu í samvinnu við stjórnendur og eigendur. Þeir þurfa þó að hafa fram að færa verðmæti til rekstrarins sem tryggja bankanum betri endurheimtur, sýna samstarfsvilja og njóta trausts. Í tilviki Ölgerðarinnar voru þessi skilyrði fyrir hendi.

Helstu atriði fjárhagslegrar endurskipulagningar Ölgerðarinnar:

• Auður I og meðfjárfestar fjárfesta í Ölgerðinni og leggja félaginu til nýtt hlutafé. Nýtt hlutafé kemur að öllu leyti til lækkunar skulda félagsins. Nýir fjárfestar eignast þannig 36% hlut í Ölgerðinni. Kaupverð er trúnaðarmál.

• Arion banki breytir hluta skulda Ölgerðarinnar við bankann í hlutafé og eignast 20% hlut í félaginu.

• Skuldir Ölgerðarinnar fyrir fjárhagslega endurskipulagningu námu um 9,5 milljörðum kr., þar af voru tæp 75% í erlendri mynt. Að lokinni endurskipulagningu verða öll lán félagsins í íslenskum krónum.

• Heildarskuldir félagsins eftir fjárhagslega endurskipulagningu verða um 7,2 milljarðar. Lækkun skulda félagsins er tilkomin vegna inngreiðslu nýs hlutafjár og skuldbreytingar Arion banka í hlutafé.

• Hluti endurskipulagningarinnar snýr að fasteignum Ölgerðarinnar sem eru í eigu G7 fasteignafélags. Skuldir G7 fasteignafélags nema 4,6 milljörðum. Félagið var fyrir endurskipulagningu í eigu Ölgerðarinnar, sem átti 51% hlut, og Arion banka, sem átti 49% hlut. Við endurskipulagninguna tekur Arion banki yfir eignahlut Ölgerðarinnar og eignast þar með allt hlutafé G7 fasteignafélags. Ölgerðin mun leigja fasteignirnar af G7 á markaðskjörum.

Um Ölgerðina

Ölgerðin er eitt af elstu iðnfyrirtækjum á Íslandi, stofnað 1913. Hjá fyrirtækinu starfa um 300 starfsmenn. Fyrirtækið framleiðir mörg af elstu og sterkustu vörumerkjum landsins og flytur inn og dreifir fjölbreyttu úrvali vörumerkja frá birgjum um allan heim. Árið 2007 keyptu Októ Einarsson og Andri Þór Guðmundsson meirihluta í Danól og Ölgerðinni á móti Kaupþingi banka. Fyrirtækin voru sameinuð í kjölfarið. Fjórir framkvæmdastjórar keyptu síðan hlut Kaupþings í sameinuðu félagi.