Fram­taks­sjóður Ís­lands kaup­ir 39% hlut í N1 af Arion banka

Framtakssjóður Íslands hefur keypt um 39% hlutafjár í verslunar- og þjónustufyrirtækinu N1 af Arion banka hf. Þar af er 10% hlutur sem fyrrum skuldabréfaeigendur N1 eiga kauprétt á síðar. Áður hafði Framtakssjóðurinn keypt 15,8% hlut af Íslandsbanka hf. og Skilanefnd Glitnis. Að því gefnu að kaupréttir í N1 verði nýttir mun Framtakssjóður Íslands fara með tæplega 45% eignarhlut í N1. Stefnt er að skráningu N1 í kauphöll ekki seinna en á miðju ári 2013.

Finnbogi Jónsson, framkvæmdastjóri Framtakssjóðs Íslands: „Það er ánægjulegt að Framtakssjóðurinn hafi fengið tækifæri til að auka enn frekar eignarhlut sinn í N1 og þar með koma með sterkum hætti að mikilvægu fyrirtæki í íslensku efnahagslífi sem undanfarið hefur að langstærstum hluta verið í eigu banka. N1 hefur alla burði til að standa sig vel í öflugri samkeppni á neytenda- og fyrirtækjamarkaði á komandi árum. Við munum leggja áherslu á að bæta rekstur félagsins enn frekar og koma síðan félaginu á hlutabréfamarkað með dreifðu eignarhaldi.“

Höskuldur H. Ólafsson, forstjóri Arion banka: „N1 er stærsta félag sinnar tegundar á Íslandi og gegnir mikilvægu þjónustuhlutverki um land allt. Markmið bankans í fjárhagslegri endurskipulagningu félagsins var að tryggja áframhaldandi rekstur þess og það markmið hefur nú náðst. Arion banki ætlaði sér aldrei að vera langtíma eigandi félagsins og telur mikilvægt að koma félaginu sem fyrst í almenna eigu. Þau áform hafa nú gengið eftir með sölunni á N1 til Framtakssjóðsins sem er í eigu nokkurra lífeyrissjóða landsins. Arion banki telur mjög mikilvægt að skrá á markað þau félög sem þar eiga heima í því augnamiði að endurreisa íslenska hlutabréfamarkaðinn. Sú ákvörðun sem nú liggur fyrir að hálfu Framtakssjóðsins um skráningu N1 á markað var ein af meginforsendum fyrir sölu bankans á sínum hlut. Við teljum þetta góða niðurstöðu fyrir bankann og N1.“

Eftir viðskiptin á Arion banki hf. ekki hlut í N1. Viðskiptin eru gerð með fyrirvara um niðurstöðu áreiðanleikakönnunar og samþykki Samkeppniseftirlits.