25.11.2013
Frjálsi lífeyrissjóðurinn valinn besti lífeyrissjóður smáþjóða
Frjálsi lífeyrissjóðurinn hefur verið valinn besti lífeyrissjóður smáþjóða af fagtímaritinu Investment Pension Europe (IPE).
Í umsögn dómnefndar kom meðal annars fram að góð ávöxtun sjóðsins hefði verið byggð á framsýnum fjárfestingarákvörðunum og öflugri áhættustýringu.
Árin 2009-2011 var Frjálsi lífeyrissjóðurinn valinn besti lífeyrissjóður á Íslandi af IPE fagtímaritinu. Í ár og árið 2012 voru ekki veittar viðurkenningar fyrir Ísland sérstaklega heldur keppa sjóðir frá Íslandi nú í flokki smáþjóða, eins og sjóðir átta annarra Evrópulanda með færri en eina milljón íbúa.
Frjálsi lífeyrissjóðurinn, sem er í rekstri hjá Arion banka, er um 130 milljarðar að stærð og sjóðfélagar eru um 47 þúsund talsins. Sjóðurinn hentar þeim sem hafa frjálst val um í hvaða lífeyrissjóð þeir greiða 12% skylduiðgjald og hentar jafnframt þeim sem leggja fyrir í viðbótarlífeyrissparnað.
IPE er eitt virtasta fagtímarit Evrópu um lífeyrismál. Árlega veitir tímaritið þeim lífeyrissjóðum verðlaun sem að mati sérfræðinga IPE hafa skarað fram úr í sínu heimalandi og í Evrópu. Breski lífeyrissjóðurinn Pension Protection Fund var valinn besti lífeyrissjóður í Evrópu að þessu sinni.
Arnaldur Loftsson framkvæmdastjóri Frjálsa lífeyrissjóðsins:
„Verðlaunin eru ánægjulegur vitnisburður um fagleg vinnubrögð við mótun fjárfestingarstefnu og við ákvarðanatöku í eignastýringu sjóðsins. Þau eru starfsfólki og stjórn sjóðsins hvatning til áframhaldandi góðra verka með það að markmiði að ná góðri ávöxtun og veita sjóðfélögum framúrskarandi þjónustu.“
Deila grein:
