Í kjöl­far dóms Hæsta­rétt­ar

Með boðuðu frumvarpi efnahags- og viðskiptaráðherra, í kjölfar dóms Hæstaréttar Íslands í dag er dregið úr óvissu sem ríkt hefur að undanförnu um skuldamál einstaklinga. Hið langvinna óvissuástand hefur valdið viðskiptavinum bankans óþægindum og takmarkað svigrúm hans til úrlausnar á skuldamálum einstaklinga og heimila.

Í kjölfar lagasetningar mun liggja fyrir nákvæmari útfærsla og útreikningar gagnvart viðskiptavinum Arion banka. Arion banki vekur þó athygli á að dómur Hæstaréttar frá í dag fjallar um bílalán en Arion banki er ekki með nein slík lán í bókum sínum.

Bankinn stendur traustum fótum

Arion banki hefur á undanförnum mánuðum unnið með Fjármálaeftirlitinu við að meta hugsanleg áhrif af lánum í erlendri mynt á efnahag bankans. Það er mat bankans að þó fyrirhugað frumvarp ráðherra verði að lögum þá hafi það óveruleg áhrif. Bankinn muni áfram uppfylla skilyrði Fjármálaeftirlitsins um 16% eiginfjárhlutfall og 20% lausafjárhlutfall.

Lántakendum erlendra íbúðalána býðst áfram að greiða 5.000 krónur af hverri milljón

Fram að lagasetningu Alþingis mun Arion banki áfram bjóða viðskiptavinum sínum með íbúðalán í erlendri mynt, og með veði í fasteign, að greiða 5.000 kr. af hverri milljón upphaflegs höfuðstóls. Þá ítrekar bankinn að viðskiptavinir glata ekki betri rétti þótt þeir nýti sér úrræði bankans og áréttar að engar nauðungarsölur á íbúðahúsnæði verða á vegum bankans á þessu ári.

Arion banki þakkar viðskiptavinum sínum biðlundina í þeirri óvissu sem varað hefur allt of lengi. Það er von bankans að senn liggi fyrir skýr sýn og verklag um það hvernig vinna megi að lausn mála í góðri sátt viðskiptavina og bankans.