19.09.2011
Íslensk nýsköpun stýrir orkunotkun Arion banka
Arion banki hefur valið íslenskan nýsköpunarbúnað frá ReMake Electric til að stjórna orkunotkun í höfuðstöðvum bankans í Borgartúni og í nýja útibúinu á Höfða. Um er að ræða orkustjórnunarkerfi, byggt á íslensku hugviti, sem nýsköpunarfyrirtækið hefur þróað.
Orkustjórnunarkerfið heitir eTactica (etactica.com) en nýjungin felst í því að rafskynjunarbúnaði frá ReMake Electric er komið fyrir í rafmagnstöflum í bankanum þar sem álag og notkun raforku er mæld og gerð sýnileg bæði í rafmagnstöflunni og á eTactica vefsíðu bankans. Á vefsíðunni hefur Arion banki yfirsýn yfir mismunandi rafmagnsgreinum, rafmagnstöflum og útibúum bankans á einum miðlægum stað sem skapar forsendur fyrir sparnaði í orkunotkun. Kerfið sendir tilkynningar um breytingar og óeðlilega notkun með smáskilaboðum og tölvupósti sem gerir Arion banka kleift að fyrirbyggja óþarfa orkunotkun og tryggja að vandamál verði augljós í tæka tíð.
Höskuldur H. Ólafsson, bankastjóri Arion banka: „Það skiptir máli fyrir Arion banka að vera í fararbroddi í rekstrarstjórnun og orkunýtingu. Með því að velja kerfið frá ReMake Electric fær bankinn verkfæri til að halda úti ítarlegu eftirliti með raforkunotkun sem skilar okkur auknum áreiðanleika og sparnaðarleiðum. Okkur er einnig kappsmál að stuðla að nýsköpun íslenskra fyrirtækja til að efla íslenskt atvinnulíf og erum við stolt af því að vera fyrsti viðskiptavinur ReMake‘‘
Hilmir Ingi Jónsson, framkvæmdastjóri ReMake Electric ehf: „Það er mikið ánægjuefni að Arion banki sé okkar fyrsti viðskiptavinur. Samstarfið við bankann er mikilvægur áfangi í okkar þróun og við hlökkum til að ná árangri í sameiningu.“
Um ReMake Electric
Nýsköpunarfyrirtækið ReMake Electric hefur verið styrkt af Tækniþróunarsjóði og Impru í vöruþróun sinni og náð miklum árangri. Fyrirtækið sigraði í hugmyndasamkeppni N1s árið 2009 og vann síðan Gullegg Innovits árið 2010. Enn fremur komst ReMake í undanúrslit Global Cleantech keppninnar í Kísildal í Kaliforníu árið 2010 og í undanúrslit Nordic Cleantech keppninnar í Trolleholm kastala í Svíþjóð 2011.
Hilmir Ingi Jónsson frá ReMake Electric og Höskuldur H. Ólafsson bankastjóri Arion banka við undirskrift samningsins
Deila grein:
