Lestrar­vika Arion banka og Disney: 760 þús­und blað­síður lesn­ar

Lestrarviku Arion banka og Disney lauk mánudaginn 14. nóvember. Ekki var um eiginlega keppni að ræða heldur var markmið Lestrarvikunnar að hvetja krakka á öllum aldri til að vera duglegir að lesa sér til skemmtunar.

Um tvö þúsund krakkar skráðu sig til leiks og lásu um 760 þúsund blaðsíður. Ekki skipti máli hvað var lesið; skáldsögur, teiknimyndasögur, skólabækur, Andrés blöð eða annað skemmtilegt lesefni, allt taldist með.

Í lok lestrarvikunnar voru dregin út nöfn yfir 100 þátttakenda sem fengu Disney kökubókina í verðlaun. Auk þess fá allir þátttakendur í lestrarvikunni sent til sín viðurkenningarskjal og Andrésblað í pósti.

Í gær, á degi íslenskrar tungu, var Lestrarhestur Arion banka dreginn út af handahófi af þeim sem tóku þátt og sinntu lestrinum vel. Fékk Lestrarhesturinn iPad í verðlaun. Sú heppna var Anna Bríet Bjarkadóttir og las hún 1.100 blaðsíður á meðan á Lestrarvikunni stóð. Óskum við henni til hamingju og þökkum öllum þeim fjölmörgu krökkum sem tóku þátt fyrir þátttökuna.

Verðlaunahafar fengu verðlaunin afhent í Arion banka gær og skemmti trúðurinn Wally krökkunum og aðstandendum þeirra.

Á meðfylgjandi myndum má sjá verðlaunahafana sem og trúðinn Wally að skemmta verðlaunahöfum og aðstandendum þeirra.