09.05.2012
Mikill áhugi á Startup Reykjavík - 179 umsóknir
Yfir 400 einstaklingar vilja taka þátt
Á Sprotaþingi Íslands sem haldið var í höfuðstöðvum Arion banka í apríl kynnti bankinn nýtt örfjárfestingarverkefni að erlendri fyrirmynd sem kallast Startup Reykjavík og er unnið í samstarfi við Innovit og Klak.
Mikill áhugi er á verkefninu. Frestur til þess að sækja um rann út þann 7. maí en frumkvöðlar úr öllum atvinnugreinum gátu sótt um þátttöku. Alls bárust 179 umsóknir, sem yfir 400 einstaklingar standa að baki.
Í lok maí, eða eigi síðar en 25. maí, verður tilkynnt hvaða 10 viðskiptateymi frumkvöðla verða valin til þátttöku. Hvert teymi mun svo vinna að sinni viðskiptahugmynd í sumar, eða frá 11. júní - 17. ágúst, þar sem þeim verður lagt eftirfarandi til:
2 milljónir í hlutafé frá Arion banka gegn 6% hlutdeild í fyrirtækinu
10 vikna þjálfun/ráðgjöf frá sérfræðingum víðs vegar úr atvinnulífinu
Sameiginleg aðstaða allra viðskiptateyma
Aðgangur að tengslaneti Global Accelerator Network
Tækifæri til að kynna sig og verkefni sín fyrir fjárfestum á lokadegi verkefnisins
Af þessum mikla áhuga má ráða að með Startup Reykjavík er verið að uppfylla mikla þörf fyrir aukna fjárfestingu í sprotafyrirtækjum. Fjölbreytileiki í innsendum viðskiptahugmyndum var áberandi sem og bakgrunnur og samsetning einstaklinga í viðskiptateymunum.
Startup Reykjavík er hluti af tengslaneti Global Accelerator Network. Samstarfið við Global Accelerator Network felur í sér tækifæri fyrir ung fyrirtæki til að kynna sín verkefni fyrir erlendum aðilum bæði hvað varðar þróun hugmynda og mögulega framtíðarfjármögnun.
Deila grein:
