16.04.2012
Mikill áhugi á Startup Reykjavík - þegar byrjað að taka við umsóknum
Á Sprotaþingi Íslands sem haldið var í höfuðstöðvum Arion banka í gær kynnti bankinn nýtt frumkvöðlasetur sem kallast Startup Reykjavík og er unnið í samstarfi við Innovit og Klak.
Startup Reykjavík mun fara fram yfir sumarmánuðina og verða í vor valin 10 teymi frumkvöðla sem hvert um sig mun vinna að sinni viðskiptahugmynd þar sem þeim verður lagt eftirfarandi til:
2 milljónir í hlutafé frá Arion banka gegn hlutdeild í fyrirtækinu
10 vikna þjálfun frá sérfræðingum víðs vegar úr atvinnulífinu og starfsfólki Innovits og Klaks
Aðgangur að tengslaneti Global Accelerator Network
Tækifæri til að kynna sig og verkefni sín fyrir fjárfestum á lokadegi verkefnisins
Startup Reykjavík er þannig hluti af tengslaneti Global Accelerator Network sem aftur er alþjóðlegi hlutinn af starfsemi Techstars í Bandaríkjunum. Samstarfið við Global Accelerator Network felur í sér tækifæri fyrir ung fyrirtæki til að kynna sín verkefni fyrir erlendum aðilum bæði hvað varðar þróun sinna hugmynda og mögulega framtíðarfjármögnun.
Greinilegt er að þetta framtak kemur í góðar þarfir því að umsóknir eru þegar farnar að berast vef verkefnisins, www.startupreykjavik.com. Hægt er að sækja um fram til 7. maí næstkomandi.
Höskuldur H. Ólafsson, bankastjóri Arion banka:
„Það er okkur mikilvægt að styðja við nýsköpun og stuðla þannig að aukinni verðmætasköpun og fjölbreytni atvinnulífs í landinu. Við kjósum hér að gera það með því að taka þátt í uppbyggingu valinna verkefna á viðskiptalegum forsendum og leggja þeim til hlutafé, aðstöðu og ráðgjöf nú í sumar. Þar sem þetta verkefni veitir aðgang að alþjóðlegu neti frumkvöðla, skapast einnig tækifæri fyrir íslenska frumkvöðla til að sækja sér þekkingu og hugsanlega fjármagn erlendis frá. Við erum mjög spennt að sjá hvernig þetta verkefni mun þróast nú á vormánuðum og í sumar.“
Deila grein:
