Nýr samningur um milli­banka­þjónustu

Þann 1. febrúar tekur gildi nýr samningur banka og sparisjóða um millibankaþjónustu en það telst vera þjónusta sem veitt er þegar bankar og sparisjóðir afgreiða viðskiptavini annarra banka og sparisjóða. Þetta á til að mynda við þegar tekið er út af reikning í öðrum banka en viðskiptabanka reikningseiganda og þegar reikningur er greiddur í öðrum banka en þeim sem gefur út greiðsluseðilinn. Með þessum samningi fellur úr gildi eldri samningur og gjald vegna millibankaþjónustu sem verið hefur óbreytt frá árinu 1997.

Breytingin er gerð til þess að koma til móts við athugasemdir Samkeppniseftirlitsins við fyrirkomulag gjaldtöku vegna þessarar þjónustu, en fram til þessa hefur gjald vegna millibankaþjónustu verið samræmt milli banka og sparisjóða og innheimt af banka eða sparisjóði viðskiptamanns.

Samningurinn felur í sér að hver og einn banki eða sparisjóður ákvarðar einhliða þau gjöld sem hann innheimtir vegna millibankaþjónustu. Þegar viðskiptavinur fjármálafyrirtækis sækir sér þjónustu í öðrum banka eða sparisjóði en sínum eigin þá miðast kostnaðurinn við verðskrá þess sem veitir þjónustuna. Bönkum og sparisjóðum er þó heimilt að taka þátt í að greiða fyrir millibankaþjónustu fyrir hönd sinna viðskiptavina.

Arion banki mun frá og með 1. febrúar hækka úttektargjald af debetkorti í hraðbanka fyrir aðra en viðskiptavini bankans úr 110 krónum í 155 krónur. Áfram verður úttektin viðskiptavinum Arion banka að kostnaðarlausu. Frekari gjaldskrárhækkanir liggja ekki fyrir vegna samnings um millibankaþjónustu en Arion banki mun að óbreyttu ekki taka þátt í að greiða fyrir millibankaþjónustu annarra viðskiptabanka og sparisjóða.