Nýtt úti­bú Arion banka opn­að í Borgar­túni

Í morgun opnaði Arion banki nýtt og glæsilegt útibú að Borgartúni 18. Þar kemur saman starfsfólk Arion banka sem áður starfaði í útibúum bankans við Hlemm og í Austurstræti.

Nýja útibúið er hannað frá grunni út frá því hvernig einstaklingar og fyrirtæki kjósa að nýta sér fjármálaþjónustu í dag. Þar sem kröfur um fjölbreytta þjónustu og gæði persónulegrar ráðgjafar í brennipunkti.

Lögð er áhersla á að nýta nýjustu tækni í bankaþjónustu með nýrri kynslóð hraðbanka sem bjóða upp á fjölbreyttari aðgerðir en áður, s.s. innlagnir og greiðslu reikninga. Hraðbankarnir eru aðgengilegir viðskiptavinum umfram hefðbundinn þjónustutíma eða frá 7:00 á morgnana til 20:00 á kvöldin, alla daga vikunnar.

Persónuleg ráðgjöf og þjónusta er efld í nýja útibúinu og er fleira starfsfólk en áður til taks til að sinna sérhæfðri fjármálaþjónustu s.s. ráðgjöf á sviði sparnaðar, lífeyrismála og fjármögnunar íbúðarhúsnæðis.

Nú þegar útibú Arion banka við Borgartún 18 hefur tekið til starfa, hefur útibúi bankans við Austurstræti verið lokað en boðið verður upp á þjónustu gjaldkera í útibúinu við Hlemm fram til 8. ágúst.