01.03.2011
Nýtt útibú Arion banka opnar á Höfða
Arion banki opnar nýtt útibú bankans að Höfða miðvikudaginn 23. mars. Útibú Arion banka að Suðurlandsbraut, í Árbæ og í Grafarvogi sameinast í nýju útibúi bankans á Höfða, sama húsnæði og Húsgagnahöllin er til húsa í við Bíldshöfða.
Hið nýja útibú verður eitt stærsta og glæsilegasta útibú bankans og verður þar boðið upp á alhliða fjármálaþjónustu þar sem áhersla er lögð á faglega og persónulega þjónustu. Aðstaðan í Höfðaútibúi er öll hin besta og næg bílastæði eru á staðnum.
Síðasti afgreiðsludagur útibúanna að Suðurlandsbraut, í Árbæ og í Grafarvogi verður því 22. mars. Öll bankaviðskipti verða færð í nýja útibúið og munu banka- og reikningsnúmer haldast óbreytt ásamt debet- og kreditkortum.
Viðskiptavinir geta eftir sem áður sótt daglega þjónustu í hvaða útibúi bankans sem er og í gegnum Þjónustuver Arion banka.
Deila grein:
