Ráð­stefna í Há­skóla­bíói 1. nóv­em­ber - Michael Port­er

Michael Porter kynnir rannsókn á klasamyndun í íslenskum jarðvarmageira

Arion banki verður aðalbakhjarl rannsóknarinnar

Undirritað hefur verið samkomulag milli ráðgjafafyrirtækisins Gekon og Arion banka þess efnis að bankinn verði aðalbakhjarl rannsóknar á klasamyndun í íslenskum jarðvarmageira undir forystu Dr. Michael Porter prófessors við Harvard viðskiptaháskólann.
Rannsóknin verður kynnt á ráðstefnu í Háskólabíói 1. nóvember næstkomandi.

Michael Porter, sem er einn helsti fræðimaður heims á sviði stefnumótunar og samkeppnishæfni þjóða, er höfundur hinnar svokölluðu klasakenningar (e. Cluster policy). Kenningin tekur til myndunar sérhæfðra klasa, svo sem á sviði hátækni, sjávarútvegs, iðnaðar eða jarðvarma, sem gera samfélögum kleift að rækta styrkleika sína með skilvirkum og árangursríkum hætti með það að markmiði að auka varanlega hagsæld og velferð.

Á ráðstefnunni mun Michael Porter kynna rannsókn sína á klasamyndun í íslenskum jarðvarmageira og með hvaða hætti best sé að haga uppbyggingu íslensks jarðvarmaklasa, en Michael Porter hefur á undanförnum árum sýnt íslenskum orkugeira mikinn áhuga, ekki síst jarðvarmavinnslu.

Auk Porters mun Dr. Christian Ketels, einnig frá Harvard viðskiptaháskólanum, gera grein fyrir einkennum hins íslenska jarðvarmaklasa og Katrín Júlíusdóttir iðnaðarráðherra mun taka til máls um hlutverk stjórnvalda. Fjöldi annarra sérfræðinga, innlendra sem erlendra, mun taka til máls. Forseti Íslands, hr. Ólafur Ragnar Grímsson, er verndari ráðstefnunnar.

Það er Gekon sem á veg og vanda af komu Dr. Michael Porter til landsins og undangenginni rannsóknarvinnu undir hans stjórn og ber ábyrgð á framkvæmd vinnunnar hérlendis ásamt KPMG á Íslandi. Samstarfsaðilar hér á landi eru yfir 50 talsins: Ráðuneyti, orkufyrirtæki, verkfræðistofur, fjármálastofnanir, rannsóknarstofnanir og háskólar auk Arion banka sem er aðalbakhjarl rannsóknarinnar.