Ríf­lega hálft tonn safn­aðist í fata­söfn­un starfs­manna Arion banka til styrkt­ar Rauða krossi Ís­lands

Starfsfólk Arion banka ákvað að kveðja vetur og fagna sumri með því að taka til í skápum og geymslum og gefa í fatasöfnun Rauða krossins. Söfnunin stóð yfir í eina viku og starfsmenn bankans víða um land lögðu sitt af mörkum, allt frá Reykjavík til Sauðárkróks. Afraksturinn varð ríflega hálft tonn af fatnaði sem nú mun öðlast nýtt líf jafnt hér á Íslandi sem erlendis en Rauði krossinn nýtir allan fatnað sem hann fær. Sumt er selt úr landi og ágóðinn rennur í Hjálparsjóð Rauða krossins, annað er flokkað og gefið þurfandi á Íslandi sem og erlendis eða selt í Rauðakrossbúðunum.

„Við þökkum kærlega fyrir okkur“ segir Kristján Sturluson, framkvæmdastjóri Rauða krossins. „Þetta er lofsvert framtak og með stærri einstökum fataframlögum til Rauða krossins á síðustu árum. Við hvetjum önnur fyrirtæki til að fara að þessu góða fordæmi.“

Fatasöfnun Rauða krossins er orðin eitt mikilvægasta fjáröflunarverkefnið fyrir Hjálparsjóð Rauða kross Íslands. Afrakstur fatasöfnunar ársins 2011 var 84 milljónir króna sem greiddar voru í Hjálparsjóð en hann er einkum notaður til alþjóðlegs hjálparstarfs. Þá úthlutaði Rauði krossinn einnig fatnaði til um 1.400 einstaklinga hér á landi árið 2011, auk þess sem ýmsar stofnanir, fangelsi og meðferðarheimili fengu fatnað fyrir sína skjólstæðinga, þannig að hér er um að ræða afskaplega gott og þarft málefni.