18.03.2011
SF1, félag í rekstri Stefnis, tryggir fjármögnun á kaupum á meirihluta Sjóvár
SF1, félag í rekstri Stefnis hf, dótturfélags Arion banka, hefur tryggt fjármögnun á kaupum á 52,4% af hlutafé í Sjóvá-Almennum tryggingum hf. („Sjóvá“). Meðal helstu eigenda SF1 eru margir af stærstu lífeyrissjóðum landsins.
Fjármögnunin er hluti kaupsamnings milli Eignasafns Seðlabanka Íslands ehf. („ESÍ“) og SF1 sem gerður var í lok söluferlis sem hófst í janúar á síðasta ári og fyrirtækjaráðgjöf Íslandsbanka hefur haft umsjón með. Kaupsamningurinn er háður skilyrðum um tiltekin atriði, þ.á.m. samþykki Fjármálaeftirlitsins, Samkeppniseftirlitsins og stjórnar ESÍ, en vonast er til að afhending geti átt sér stað innan þriggja mánaða.
Stefnir hf., sem leiddi kaupsamningsferlið fyrir hönd kaupanda, er sjálfstætt starfandi fjármálafyrirtæki sem rekur innlenda og alþjóðlega verðbréfasjóði, fjárfestingarsjóði og fagfjárfestasjóði fyrir einstaklinga og fagfjárfesta.
Fyrirtækjaráðgjöf Arion banka var meðal ráðgjafa kaupanda í ferlinu.
Deila grein:
