SFF vek­ur at­hygli á breyt­ingum í net­bönk­um

Samtök fjármálafyrirtækja hafa sent frá sér eftirfarandi tilkynningu.

SFF tilkynna um öryggisuppfærslu netbanka

Netbankar viðskiptabanka og sparisjóða verða uppfærðir samkvæmt nýjum öryggiskröfum mánudaginn 11. maí næstkomandi. Ný tegund spilliforrita á Netinu, svokölluð þriðja kynslóð Trojuhesta (e. man-in-the-browser Trojan), hefur undanfarna mánuði valdið usla víða um heim. Þessi tegund spilliforrita sækir aðgangsupplýsingar netbankanotenda í þeim tilgangi að misnota þær. Samtök fjármálafyrirtækja (SFF) vöruðu við þessari tegund spilliforrita í fréttatilkynningu 15. apríl síðastliðinn.

Ljóst er að í mörgum tilvikum er öryggi í tölvum netnotenda ábótavant sem spilliforrit geta fært sér í nyt. Til að auka öryggi netbanka hafa fjármálafyrirtæki á Íslandi bætt við öryggisskrefi þar sem auðkennislykillinn gegnir veigamiklu hlutverki. Eftir uppfærslu netbankanna verður nauðsynlegt að staðfesta sérstaklega með auðkennislyklinum þegar millifært er á nýja viðtakendur eða á viðtakendur þar sem langt er frá síðustu millifærslu. Sé millifært aftur á viðtakanda sem hefur verið staðfestur með þessum hætti er ekki nauðsynlegt að endurtaka öryggisskrefið.

Af þessu tilefni vilja SFF jafnframt ítreka mikilvægi þess að tölvur netnotenda hafi viðurkennda vírusvörn og að stýrikerfi og önnur forrit séu ávallt með nýjustu uppfærslum.
Dæmi um forrit sem 3. kynslóð Trojuhesta hafa notað sem smitleið eru Adobe Acrobat, Apple Quick Time, Real Player og Java og því mikilvægt að uppfæra slík forrit þegar nýjar uppfærslur berast.
Á heimasíðu SFF má finna gátlista um gagnaöryggi á netinu með upplýsingum um hvað ber almennt að varast við netnotkun og meðferð aðgangsupplýsinga. Einnig er að finna góðar upplýsingar um netöryggi og öryggisprófanir á www.netoryggi.is.

Rétt er að árétta að íslensk fjármálafyrirtæki standa mjög framarlega á sviði netöryggismála og er sú vinna í stöðugri þróun undir forystu SFF. Ekkert fjárhagstjón hefur orðið hér á landi til þessa af völdum spilliforritsins.


Nánari upplýsingar veitir Daði Sverrisson hjá SFF í síma 8 200 404.