03.04.2009
Sparisjóður Mýrasýslu semur við stærstu lánardrottna og selur Nýja Kaupþingi allar eignir
Stærstu lánardrottnar Sparisjóðs Mýrasýslu „SPM“ samþykktu tillögu að fjárhagslegri endurskipulagningu SPM 27. mars síðastliðinn. SPM hafði í kjölfarið frumkvæði að því að ganga til samninga við Nýja Kaupþing. Það var gert til að tryggja áframhaldandi þjónustu við viðskiptavini sjóðsins og með hagsmuni samfélagsins í huga.
Á grundvelli samkomulagsins við stærstu lánardrottna hefur SPM selt eignir sínar til Nýja Kaupþings. Bankinn mun greiða fyrir eignirnar með skuldabréfi og útgáfu nýrra hluta í samræmi við þá tillögu sem stærstu lánardrottnar hafa samþykkt. Samhliða þessu eignast Nýja Kaupþing allt stofnfé í SPM. Samningurinn er háður endanlegu samþykki Fjármálaeftirlitsins.
Með kaupunum yfirtekur Nýja Kaupþing allar eignir og tilteknar skuldir SPM, þar með talin innlán, sem eru að fullu tryggð. Nýja Kaupþing tekur við rekstri afgreiðslu SPM í Borgarnesi. Stefnt er að sameiningu útibúa Nýja Kaupþings og SPM í Borgarnesi á næstu vikum. Bernhard Þór Bernhardsson sparisjóðsstjóri SPM tekur við sameinuðu útibúi SPM og Nýja Kaupþings.
Þessi lausn tryggir viðskiptavinum SPM óbreytta þjónustu.
Jafnframt mun Nýja Kaupþing eignast dótturfélög SPM, þar með talið Afl Sparisjóð og Sparisjóð Ólafsfjarðar. Stefnt er að rekstri þeirra í óbreyttri mynd.
Sparisjóður Mýrasýslu hefur átt í miklum fjárhagsörðugleikum undanfarin misseri. Með þessu næst farsæl lausn á vanda hans sem lánardrottnar, viðskiptavinir, starfsfólk og aðrir hagsmunaðilar geta verið sáttir við.
Þá er ekki lengur þörf á eiginfjárframlagi frá ríkissjóði eins og sparisjóðurinn hefur kost á samkvæmt neyðarlögunum.
Deila grein:
