18.12.2012
Starfsmenn Arion banka syngja til styrktar Geðhjálp
Arion banka barst áskorun um að taka þátt í jólalagakeppninni Geðveik jól í ár og styrkja þannig Geðhjálp. Þessu skemmtilega verkefni var því hrundið af stað í byrjun nóvembermánaðar. Ákveðið var að taka íslenskt lag og setja það í jólabúning og stóð ekki á strákunum í Jeff Who? sem lánuðu okkur lagið Barfly fyrir keppnina. Í okkar búning fékk lagið titilinn „Höldum geðveik jól“.
Með aðstoð fjölda starfsmanna ásamt nokkurra utanaðkomandi aðila s.s. framleiðslufyrirtækisins Tjarnargötu, Kex hostel og fleiri tókum við upp jólaútgáfu af Barfly og gerðum við það tónlistarmyndband. Annar aðalsöngvari lagsins; Hjalti Már Hauksson, hreppti fyrsta sætið í söngvakeppni bankans sem haldin var í vor en hinn, Rúnar Magni Jónsson, vann keppnina fyrir fimm árum síðan. Það var svo Margrét Bragadóttir, sem starfar á fyrirtækjasviði, sem samdi textann við lagið sem var svo feykivinsælt árið 2005.
Það fyrirtæki sem nær að safna hæstri upphæð fyrir Geðhjálp vinnur keppnina en henni lýkur kl. 16 miðvikudaginn 19. desember. Við bendum fólki á að kynna sér keppnina á gedveikjol.is, kjósa sitt uppáhaldslag og styrkja verðugt málefni.
Deila grein:
