28.05.2015
Startup Reykjavik valinn besti viðskiptahraðall Norðurlanda
Viðskiptahraðallinn Startup Reykjavík hlaut í gær viðurkenningu Nordic Startup Awards sem besti viðskiptahraðall Norðurlanda. Í dómnefnd voru um tuttugu einstaklingar hvaðanæfa að úr heiminum úr röðum virtra frumkvöðla, fjárfesta, stjórnenda og annarra sérfræðinga. Hörður Arnarson, forstjóri Landsvirkjunar, á sæti í dómnefnd fyrir hönd Íslands.
Það eru Arion banki og Klak Innovit sem standa að Startup Reykjavík sem fór fyrst fram árið 2012 og mun fara fram í fjórða sinn nú í sumar. Arion banki hefur fjárfest í þrjátíu sprotafyrirtækjum í gegnum Startup Reykjavík á síðustu þremur árum og leggur viðskiptahraðlinum jafnframt til fjármagn og aðstöðu. Klak Innovit sér um framkvæmd verkefnisins.
Meðal verkefna sem hafa tekið þátt í Startup Reykjavík eru Zalibuna, Activity Stream, Herberia, Mure VR, CrowbarProtein, SuitMe og Þoran Distillery.
Hvert ár er teymunum tíu sem valin eru til þátttöku lagt eftirfarandi til:
2 milljónir í hlutafé frá Arion banka gegn 6% hlutdeild í fyrirtækinu
10 vikna þjálfun/ráðgjöf frá mentorum víðs vegar að úr atvinnulífinu
Sameiginleg aðstaða allra viðskiptateymanna
Tækifæri til að kynna sig og verkefni sín fyrir fjárfestum á lokadegi verkefnisins
Deila grein:
