11.03.2014
Tónlistarmaðurinn Jón Jónsson fræðir ungt fólk um fjármál
Jón Jónsson, tónlistarmaður og hagfræðingur, mun nú í mars og apríl ferðast um landið á vegum Arion banka til að fræða ungt fólk á skemmtilegan hátt um fjármál.
Þetta er í þriðja sinn sem Jón Jónsson tekur að sér fjármálafræðslu fyrir ungt fólk og hafa fyrirlestrar hans notið mikilla vinsælda. Fyrirlestrarnir eru unnir í samstarfi við Stofnun um fjármálalæsi en Arion banki er aðal styrktaraðili stofnunarinnar.
Fyrirlestrar Jóns Jónssonar verða með svipuðu sniði og undanfarin tvö ár. Hann mun, eins og honum einum er lagið, leitast við að svara fjölmörgum spurningum sem snúa að fjármálum og þá sérstaklega fjármálum ungs fólks. Meðal þess sem Jón Jónsson mun ræða í sínum fyrirlestrum:
Hvernig virka peningar
Markmiðasetning til skamms og langs tíma
Að velja og hafna (fórnarkostnaður)
Muninn á þörfum og óskum
Á síðasta ári var víðast hvar fullt út úr dyrum. Í ár mun Jón Jónsson koma við á fleiri stöðum á landinu en áður. Fyrsti fyrirlesturinn verður í Reykjavík þann 12. mars og fer fram í Arion banka, Borgartúni 19. Næstu fyrirlestrar verða svo í Hveragerði þann 17. mars og á Egilsstöðum þann 19. mars. Í kjölfarið verður Jón Jónsson með fyrirlestra á Hellu, Sauðárkróki, Akureyri, Borgarnesi og Hafnarfirði, en dagsetningar þeirra fyrirlestra verða auglýstar þegar nær dregur. Fyrirlestraröðin endar svo í Reykjavík hjá Arion banka, Borgartúni 19, þann 9. apríl.
Allar nánari upplýsingar er að finna hér á vef Arion banka og þar er hægt að skrá sig á fyrirlestra Jón Jónssonar.
Deila grein:
