Um­sókn­ar­frest­ur í Startup Energy Reykja­vík er 11. nóv­em­ber

Startup Energy Reykjavík (SER) er viðskiptahraðall þar sem ung fyrirtæki í orkutengum iðnaði og þjónustu fá víðtækan stuðning við frekari mótun sinna viðskiptahugmynda.

Startup Engergy Reykjavík fer fram á tímabilinu janúar – mars 2015 en bakhjarlar fjárfesta í allt að 7 fyrirtækjum fyrir 5 milljónir króna í hverju og einu auk þess sem 50 manna hópur úr vísinda, viðskipta- og athafnalífinu munu leiðbeina teymunum jafnt og þétt á meðan á SER stendur. Teymin munu hafa aðstöðu í Háskólanum í Reykjavík.

Skipulag SER er byggt á góðri reynslu frá Startup Reykjavík sem hefur verið haldið árin 2012-2014 en í gegnum það verkefni hefur Arion banki nú þegar fjárfest í 30 íslenskum sprotafyrirtækjum. Reynslan hefur sýnt að fyrirkomulagið hentar vel til þess að efla og undirbúa fyrirtæki sem eru að taka sín fyrstu skref í mótun og framkvæmd viðskiptahugmynda.

Hverjir eiga að sækja um?

Frumkvöðlar og verkefni sem telja að þau hafi upp á að bjóða vörur tengdum orkuiðnaðinum. Dæmi um starfsemi sem eiga gott erindi í Startup Energy Reykjavík er ýmis konar sérfræðiþjónusta, vélar, búnaður, viðhaldsþjónusta og hugbúnaður. Fyrirtæki á öllum stigum virðiskeðjunnar (framleiðsla, orkubreyting, dreifing, smásala) eiga erindi í SER.

Eftir hverju er leitað?

Varan eða þjónustan skal eiga erindi á alþjóðamarkað með skýran markhóp. Æskilegt er að verkefnið sé vel skalanlegt með tilliti til tekna. Eingöngu er horft á lausnir fyrir orkugeirann og tengdar eða afleiddar greinar.

Hvernig eru verkefnin valin?

Horft verður á hversu markaðsvæn varan eða þjónustan er og metið hvaða erindi hún á fyrir hinn skilgreinda markhóp. Samsetning teymisins á bak við hugmyndina er einnig mikilvæg, þ.e. að nægileg breidd sé í hópnum til þess að hugmyndin geti orðið að veruleika.
Bakhjarlar SER eru Arion banki, Landsvirkjun, Nýsköpunarmiðstöð Íslands og GEORG. Framkvæmd og utanumhald er í höndum Klak Innovit og Iceland Geothermal.

Vefsíða Startup Energy Reykjavík

Skoðaðu kynningarmyndband Startup Energy Reykjavík: