Undir­búningur að endurút­reikningi haf­inn

Arion banki hefur lokið fyrsta áfanga við skoðun á dómi Hæstaréttar í máli Borgarbyggðar gegn Arion banka. Dómurinn skýrir að mörgu leyti þá óvissu sem verið hefur varðandi endurútreikning gengistryggðra lána eftir dóm Hæstaréttar frá 15. febrúar sl.

Grunnniðurstaða okkar nú er að dómurinn eigi við um gengistryggð lán þar sem lántakinn var í skilum með lánið samkvæmt upphaflegum skilmálum þess. Við teljum einnig að dómurinn gildi að meginstefnu bæði um einstaklinga og fyrirtæki. Þannig er ljóst að við þurfum að endurskoða endurútreikning gengistryggðra lána, að minnsta kosti yfir það tímabil sem þau voru í skilum samkvæmt upphaflegum lánaskilmálum.

Varðandi framkvæmd endurútreikningsins þá liggur aðeins fyrir á þessum tímapunkti hvernig haga skuli endurútreikningi varðandi þann hóp lántaka sem stóð í skilum allan tímann samkvæmt upphaflegum lánaskilmálum. Undirbúningur við endurútreikning þeirra lána er hafinn.

Við vinnum nú að því að skýra með hvaða hætti rétt er að nálgast endurútreikninginn í öðrum tilfellum, svo sem þegar lántakinn fékk frystingu eða greiddi ákveðna upphæð af hverri milljón. Þetta mun allt taka tíma og getum við á þessum tímapunkti ekki sagt til um hvenær niðurstaða þess mun liggja fyrir.