Vegg­mynd Sig­ur­jóns Ólafs­son­ar til sýnis í höfuð­stöðv­um bankans, Borgar­túni 19

Árið 1948 flutti Búnaðarbankinn í eigið húsnæði í Austurstræti 5. Af því tilefni voru tveir listamenn fengnir til að gera verk til að prýða afgreiðslusal hússins. Annars vegar var þetta málverkið Vorgleði eftir Jón Engilberts og hins vegar veggmynd Sigurjóns Ólafssonar úr koparvír af húsdýrum og íslensku sveitafólki við heyskap. Segja má að þessi tvö verk séu fyrsti vísir að listasafni Búnaðarbankans sem í dag er hluti af listasafni Arion banka. Verk Sigurjóns hefur verið í Austurstræti 5 í nærri sjö áratugi en var sett upp í höfuðstöðvum bankans í Borgartúni fyrr í sumar þar sem það verður næstu mánuði.

Sigurjón fæddist á Eyrarbakka árið 1908. Hann var í hópi brautryðjenda abstraktlistar á Íslandi og var alla ævi í fararbroddi íslenskrar höggmyndalistar. Grunninn að listsköpun sinni lagði hann í Danmörku á fjórða og fimmta áratug liðinnar aldar og tók þar mótandi og virkan þátt í danskri framúrstefnulist. Standmyndir og veggskreytingar eftir hann má víða sjá í Reykjavík auk þess sem hann gerði um tvö hundruð mannamyndir af ýmsum þekktum Íslendingum. Margir kannast við verkið hans Öndvegissúlur sem stendur við Höfða sem og Íslandsmerki við Hagatorg. Sigurjón lést árið 1982.
Nú stendur yfir yfirlitssýning á verkum Sigurjóns í Listasafni Íslands og Listasafni Sigurjóns Ólafssonar á Laugarnestanga, en það safn varð deild innan Listasafns Íslands árið 2012. Sýningarnar standa út október.

Við hvetjum alla til að koma við í höfuðstöðvum bankans og skoða verk Sigurjóns, auk þess sem stutt er í Listasafn Sigurjóns Ólafssonar á Laugarnestanga.