Veg­leg gjöf frá starfs­fólki Nýja Kaupþings

Formaður starfsmannafélags Nýja Kaupþings afhenti í dag forsvarsmönnum átaksins á Allra vörum tæplega ellefu hundruð þúsund krónur að gjöf frá starfsfólki bankans. Gríðarlega góð þátttaka var í átakinu en tæplega helmingur starfsmanna lagði málefninu lið. Bankinn greiddi helmings framlag á móti starfsfólki. Að þessu sinni var safnað fyrir hvíldarheimili fyrir krabbameinssjúk börn. Þetta er stærsta einstaka gjöf frá starfsfólki fyrirtækis til átaksins Á allra vörum í ár.

Gróa Ásgeirsdóttir forsvarskona átaksins Á allra vörum:

,,Við erum virkilega ánægð með að starfsfólk Nýja Kaupþings hafi tekið svona vel við sér. Gjöfin er í anda dagsins þar sem meira er um einstaklingsframlög en nokkru sinni áður. Ég vil fyrir hönd krabbameinssjúkra barna þakka starfsfólki innilega fyrir framlagið."

Svava Halldóra Friðgeirsdóttir formaður starfsmannafélags Nýja Kaupþings:

,,Það er sérlega ánægjulegt að leggja svo góðu málefni lið. Starfsfólk Nýja Kaupþings vill leggja sitt af mörkum við uppbyggingu hvíldarheimilis fyrir krabbameinssjúk börn og við vonum að hún gangi sem allra best."

Frá afhendingu gjafarinnar. Frá vinstri, Guðrún Elín Ingvarsdóttir varaformaður starfsmannafélags Nýja Kaupþings, Svava Halldóra Friðgeirsdóttir formaður starfsmannafélags Nýja Kaupþings, Gróa Ásgeirsdóttir, Guðný Pálsdóttir og Elísabet Sveinsdóttir forsvarskonur átaksins Á allra vörum.