Vegna um­fjöll­un­ar um fyrir­tæki í eigu bankanna

Komið hefur fram í fjölmiðlum að samkvæmt upplýsingum FME hafi bankarnir í sinni eigu 137 félög sem eru í óskyldri starfsemi.

Í ljósi umræðunnar er rétt að upplýsa að af þessum 137 félögum tilheyra 37 félög Arion banka. Þar af eru 25 eignarhaldsfélög sem bankinn hefur leyst til sín sem hluta af úrlausnarferli. Þessi félög eru ekki í samkeppnisrekstri og langflest þeirra eru á leið í þrot eða slitameðferð.

Af þeim rekstrarfélögum sem eru í samkeppnisrekstri er Arion banki aðeins með ráðandi hlut í sex félögum. Þar af hafa tvö félög þegar verið seld og salan bíður samþykkis Samkeppniseftirlitsins. Um er að ræða N1 og BM Vallá. Hvað varðar hin félögin fjögur þá er unnið að skráningu Haga í Kauphöll og stefnir bankinn á að ljúka sölu þeirra þriggja sem eftir standa, Pennans, FramFood og Sigurplasts, á fyrri helmingi ársins 2012.

Til viðbótar er bankinn minnihlutaeigandi í um sex rekstrarfélögum en þar er bankinn yfirleitt háður meirihluta eigendum félagsins um sölu á eignarhlut sínum.

Því má ljóst vera að af þessum 137 félögum þá mun Arion banki, eftir skráningu Haga í Kauphöll, aðeins vera með ráðandi hlut í tveimur rekstrarfélögum sem eru í samkeppni á innanlandsmarkaði, Pennanum og Sigurplasti.

Við þetta er rétt að bæta að eftir úrskurð áfrýjunarnefndar samkeppnismála frá því í gær þá mun bankinn þurfa að taka aftur yfir rekstur svínabúanna að Brautarholti og Hýrumel í Borgarfirði.