18.04.2012
Vetur kvaddur og sumri fagnað með fatasöfnun til styrktar Rauða kross Íslands
Starfsfólk Arion banka ákvað að kveðja vetur og fagna sumri með því að taka til í skápum og geymslum og gefa að minnsta kosti eina sumar- og eina vetrarflík í fatasöfnun Rauða krossins. Fatasöfnunin hófst í morgun og fljótt kom í ljós að fleiri en tvær gamlar flíkur leyndust í skápum margra starfsmanna sem nýttu flestir tækifærið og gáfu í söfnunina þegar þeir mættu til vinnu.
Fatagámar Rauða krossins standa fyrir utan höfuðstöðvar bankans í Borgartúni 19 en einnig safna starfsmenn útibúa bankans víðs vegar um landið saman notuðum fötum sem ætlunin er að gefa nýtt líf í söfnun fyrir Rauða krossinn. Stefnt er að því að afhenda Rauða krossinum afrakstur söfnunarinnar í lok næstu viku þegar sendingar útibúa af landsbyggðinni hafa borist.
Fatasöfnun Rauða krossins er orðin eitt mikilvægasta fjáröflunarverkefnið fyrir Hjálparsjóð Rauða kross Íslands. Afrakstur fatasöfnunar ársins 2010 var 60 milljónir króna sem greiddar voru í Hjálparsjóð en hann er einkum notaður til alþjóðlegs hjálparstarfs. Þá úthlutaði Rauði krossinn einnig fatnaði til um 2.000 einstaklinga hér á landi árið 2010 þannig að hér er um að ræða afskaplega gott og þarft málefni.
Deila grein:
