VÍS í sölu­ferli

Klakki ehf., eigandi Vátryggingafélags Íslands hf. (VÍS), hefur hafið undirbúning að sölu á VÍS og er stefnt að því að nýir eigendur geti komið að félaginu nú á vormánuðum. Bæði er til skoðunar að selja félagið í heilu lagi eða skrá það í kauphöll og selja í dreifða eigu fjárfesta, þannig að endanlegt fyrirkomulag söluferlis liggur ekki fyrir. Fyrirtækjaráðgjöf Arion banka hefur umsjón með söluferlinu og undirbúningi að mögulegri kauphallarskráningu. Verði hlutabréf félagsins tekin til viðskipta í kauphöll, þá verður almenningi og stærri fjárfestum boðið að kaupa hlut í félaginu í aðdraganda þess.

VÍS er sterkt og öflugt félag og áhugaverður fjárfestingakostur, enda um að ræða stærsta vátryggingafélag landsins með ríflega þriðjungs markaðshlutdeild. Fyrirtækið stundar almenna vátryggingastarfsemi og býður alhliða tryggingalausnir fyrir einstaklinga, fjölskyldur, fyrirtæki, sveitarfélög og stofnanir, en hluti af þjónustuframboðinu er í höndum Lífís sem er dótturfélag VÍS.

Klakki er eignarhaldsfélag sem er að mestu í eigu fjármálastofnana og lífeyrissjóða. Klakki stýrir eignasafni sínu með virkum hætti og hefur að markmiði að efla starfsemi dótturfélaga sinna í þeim tilgangi að hámarka virði þeirra í þágu hluthafa sinna.

Nánari upplýsingar veitir fyrirtækjaráðgjöf Arion banka.