Of gott til að vera satt?
Rambaðirðu á gott tilboð? Mögulega of gott til að vera satt? Ef tilboð virðist grunsamlegt, eða eitthvað í umgjörð verslunar virkar ótrúverðugt, er best að staldra við og kynna sér hlutina betur.
Rambaðirðu á gott tilboð? Mögulega of gott til að vera satt? Ef tilboð virðist grunsamlegt, eða eitthvað í umgjörð verslunar virkar ótrúverðugt, er best að staldra við og kynna sér hlutina betur.
Netkort er góður valkostur fyrir þá sem vilja vera með aukakort fyrir kaup á netinu. Kortið kostar ekkert, er umhverfisvænt og aðgengilegt í Arion appinu.
Áður en þú gefur upp kortaupplýsingar er gott að kynna sér vöruna og seljandann vel. Ef seljandi er óþekktur er got að leita að nafni verslunarinnar á netinu, eða spyrjast fyrir um reynslu annarra.
Það er öruggast að versla við aðila sem þú þekkir og veist að aðrir hafa góða reynslu af.
Þegar þú verslar á netinu þarftu gjarnan að staðfesta kaupin með rafrænum skilríkjum eða í Arion appinu. Þessi staðfesting er ígildi þess að samþykkja færslu með PIN-númeri.
Það er mikilvægt að athuga hvort upphæð, mynt og nafn seljanda á staðfestingarskjá stemmi, því ef þú staðfestir kaupin er færslan óafturkræf.
Eru skilaboðin sannarlega frá aðilanum sem þú varst að versla við? Er vefslóðin rétt? Er netfangið eðlilegt? Er um sama gjaldmiðil að ræða? Stemmir upphæðin við þá upphæð sem birtist á staðfestingarskjá í appinu?
Ef þú ert í vafa skaltu hafa samband við söluaðila.
Það getur verið freistandi að fá fría prufuáskrift. Áður en þú gefur upp kortanúmer skaltu þó skoða smáa letrið vel. Skilmálar segja gjarnan að kortið verði skuldfært ef þú segir ekki upp áskriftinni innan ákveðins tímaramma.
Erlendir seljendur bjóða viðskiptavinum oft að ganga frá kaupum í íslenskum krónum. Gengið sem þeir bjóða er þó gjarnan óhagstæðara en gengi Arion banka. Það er því gott að kíkja á kjörin sem bjóðast.
Aldrei gefa öðrum upp notandanafn og lykilorð eða leyninúmer á reikningum þínum. Jafnframt skaltu ekki gefa öðrum upp SMS kóða. Gott er að temja sér að nota aldrei sama lykilorðið á tveimur stöðum.
Aldrei gefa upp kortaupplýsingar (kortanúmer, gildistíma, CVV númer) á samfélagsmiðlum, með símtali, í tölvupósti eða í gegnum SMS.
Ef þú fékkst tölvupóst um innskráningu í Arion appið sem þú kannast ekki við skaltu bregðast hratt við með því að uppfæra öryggisstillingar appsins og fjarlægja tæki sem þú þekkir ekki.
Vertu á varðbergi gagnvart innskráningarbeiðnum með rafrænum skilríkjum. Hugsaðu um rafrænu skilríkin þín eins og peningaveski.
Ef einhver bæði þig um að rétta sér veskið þitt yrði fyrsta hugsun að hafna beiðninni. Sama gildir um rafrænu skilríkin þín.
Ef þú færð tölvupóst, SMS eða símtal frá einhverjum með greiðslufyrirmælum er gott að hafa samband við viðkomandi einstakling, fyrirtæki eða stofnun til að athuga hvort greiðslan eigi í raun rétt á sér.
Gefðu þér tíma og láttu aldrei undan þrýstingi frá þriðja aðila.
Netþrjótar beita alls kyns klækjabrögðum. Til að mynda taka þeir oft frekar litlar en stórar upphæðir út af kortum svo að erfiðara sé að átta sig á því sem er að gerast. Fylgstu með færslunum og tilkynntu strax ef þú kemur auga á eitthvað óeðlilegt. Þú getur líka fryst kortið í Arion appinu eða með því að hringja í 444 7000.
Það er brýnt að vera á varðbergi gagnvart ólíkum svikaleiðum og þekkja hvernig má varast þær.
Ef þú telur þig hafa orðið fyrir netsvikum skaltu tafarlaust hafa samband við okkur í síma 444 7000 eða með því að senda tölvupóst á netfangið netsvik@arionbanki.is. Utan almenns opnunartíma er hægt að hafa samband við vaktþjónustu korthafa í síma 525 2000.
Jafnframt minnum við á að í Arion appinu er alltaf hægt að frysta kreditkortið og koma þannig í veg fyrir frekari misnotkun.
Þú getur tilkynnt netsvik með því að senda okkur tölvupóst á netfangið netsvik@arionbanki.is.
Eftir atvikum má einnig tilkynna þau til lögreglunnar í síma 444 1000 eða með því að senda tölvupóst á netfangið cybercrime@lrh.is.
Hægt er að kynna sér netsvik nánar á eftirtöldum vefsíðum:
Svikavakt Arion banka sinnir samskiptum við viðskiptavini sem lenda í svikum og starfar náið með innra eftirliti Arion banka og Rapyd.
Starfsfólk vaktarinnar er einnig vakandi fyrir grunsamlegum færslum og hefur samband við viðskiptavini ef þau koma auga á slíkt.
Svikavaktin er opin virka daga frá kl. 9:00 til 22:00 og frá kl. 10:00 til 22:00 um helgar og á frídögum. Hægt er að hafa samband með því að senda póst á netfangið netsvik@arionbanki.is.