Staðreyndir um stöðu kvenna á fjármálamarkaði
Fjöldi kvenna með verðbréfasafn hjá Arion hefur aukist um 45% á þremur árum og eru konur nú um 42% af þeim einstaklingum sem eiga verðbréfasafn hjá bankanum.
Konur hafa verið að auka við sig hvað varðar verðbréfaeign en skiptingin er þó enn 70/30 körlum í hag.
Með sama áframhaldi eru um 70 ár í að konur og karlar eigi jafn mikið í verðbréfum.
Þegar kemur að þátttöku á hlutabréfamarkaði er skipting kynjanna í Kauphöll Íslands um 70/30 körlum í hag. Þessi dreifing hefur lítið breyst undanfarin ár.
Karlar eru almennt með hærri meðaleignir í sjóðum Stefnis en konur. Hins vegar eru konur undir 30 ára með hærri meðaleignir í sjóðum Stefnis en karlar á sama aldri.
Af þeim einstaklingum sem spara í sjóðum Stefnis eru konur um 43% og karlar um 57%. Konur eiga þó einungis 36% af heildareignum í sjóðum Stefnis.
Konur sem fjárfesta í sjóðum Stefnis hafa í gegnum tíðina verið með hærri meðalaldur en karlar, en árið 2020 var hann 56 ár. Meðalaldur kvenna hefur þó farið lækkandi og er í dag sá sami og karla eða 52 ár.
Þegar horft er á óleiðréttan launamun kynjanna hefur hann lækkað um 6 prósentustig á 5 árum en hann fór úr 15% árið 2017 niður í 9% árið 2022.
Hlutfall kvenkyns stjórnarformanna hefur verið nokkurn veginn það sama og kvenkyns framkvæmdastjóra. Hlutfallið hækkaði aðeins um eitt prósentustig á tímabilinu 2012 til 2022.
Konur hafa sótt í sig veðrið í fjárfestingum en undanfarin ár hafa fjármagnstekjur kvenna, sérstaklega í yngri aldurshópum, verið að aukast. Árið 2022 var hækkun fjármagnstekna kvenna mjög áberandi en þá hækkuðu þær um 23% frá fyrra ári. Á sama tíma hækkuðu fjármagnstekjur karla um 13%. Mesta hækkunin var hjá konum á aldrinum 16-19 ára þar sem fjármagnstekjur hækkuðu um 103%.
Hlutfall kvenkyns framkvæmdastjóra á Íslandi er 24% í dag samkvæmt hlutafélagaskrá. Árið 2010 var hlutfallið 20%. Það má því segja að þróunin sé jákvæð þó hún sé hæg.
Konur verða 26 árum lengur en karlar að safna nægjanlegum lífeyri til þess að þurfa ekki að reiða sig á greiðslur frá Tryggingastofnun við starfslok. Konur sem eru fæddar árið 1984 munu, skv. rannsókn Talnakönnunar, ekki þurfa að reiða sig á ellilífeyrisgreiðslur frá Tryggingastofnun. Hins vegar munu karlar ná þeim áfanga mun fyrr eða þeir sem fæddir eru árið 1958.
Hlutdeild kvenna í viðbótarlífeyris- sparnaði Arion er um 42% og hefur aukist lítið undanfarin ár. Hlutdeild kvenna á aldrinum 19-30 ára er sá aldurshópur sem hefur aukist hvað mest eða um 3 prósentustig frá árinu 2019.
Í könnun sem Gallup framkvæmdi á árinu 2023 um lífeyrismál kom fram að konur telja sig almennt hafa verri þekkingu á eigin lífeyrismálum en karlar. Samkvæmt niðurstöðum telja 44% kvenna sig hafa litla þekkingu á sínum lífeyrismálum á meðan 34% karla telja sig hafa litla þekkingu á sínum lífeyrismálum.
Arion banki hefur gefið út stutta og aðgengilega skýrslu með samantekt á þeim árangri sem náðist á fyrsta ári átaksins Konur fjárfestum.
Í skýrslunni er farið yfir stöðu mála í upphafi árs 2024, helstu áskoranir dregnar fram í dagsljósið og sýnt með tölfræðilegum hætti hvar við þurfum að spýta í lófana til að jafna stöðuna.
