Meginhlutverk viðbótarlífeyrissparnaðar Arion banka - Lífeyrisauka er að ávaxta lífeyrissparnað sjóðfélaga og tryggja þeim hæstu mögulegu ávöxtun hverju sinni og til lengri tíma m.t.t. áhættu.
Eignastýring Arion banka, sem annast eignastýringu Lífeyrisauka, telur þá fjárfestingarkosti áhugaverða sem mæta samtímaþörfum sjóðfélaga, án þess þó að tefla í hættu framtíðarþörfum komandi kynslóða. Í 36. gr laga nr. 129/1997 (Oft nefnd lífeyrissjóðalögin) er tekið fram að stjórn lífeyrisjóða skuli móta og kunngera fjárfestingastefnu fyrir sjóðinn í samræmi við þær reglur sem lögin setja. Árið 2017 var bætt við greinina því skilyrði að lífeyrissjóðir skuli setja sér siðferðileg viðmið í fjárfestingum. Með það að markmiði hefur starfsstjórn Lífeyrisauka leitað í fræði ábyrgra fjárfestinga og mótað sjóðnum stefnu þess efnis.
Aðalmarkmið ábyrgra fjárfestinga er að stuðla að jákvæðum áhrifum á umhverfið, félagslega þætti og stjórnarhætti (UFS e. ESG). Fjárfestar velja margir hverjir að horfa til þessara þátta þegar verið er að greina og meta fjárfestingarkosti og fer sá áhugi vaxandi.
Umhverfisleg viðmið snúa að frammistöðu og eftirliti í loftslags- og umhverfismálum og því hvernig gætt er að umhverfisáhrifum starfseminnar.
Félagsleg viðmið snúa að því hvernig hugað er að starfsfólki svo og samfélaginu sem það starfar í, s.s. jafnrétti innan fyrirtækja, almennum mannréttindum og öryggi.
Stjórnarhættir snúa m.a. að stjórnun og skipulagi, birgjum, kjörum starfsfólks og aðgerðum gegn spillingu og mútum.