Banka­þjónusta fyrir börn og ung­linga

Að fara í bankann og stofna reikning, fá aðgang að netbanka og fá sitt fyrsta kort til að greiða með eru allt saman stór skref í lífi barna og unglinga.

Hluti af því að þroskast og verða fullorðin er að læra smám saman að taka ákvarðanir um peninga og skilja hvernig fjármál virka. Það þarf þó að gerast í smáum skrefum og mikilvægt er að kenna börnum og unglingum á fjármál líkt og á aðra stóra þætti í lífinu.

Fyrstu kynni barna af bankanum eru oftast að koma með sparibaukinn, leggja peninginn inn á bankabók og fá jafnvel glaðning með heim.

Börn og unglingar geta átt sína eigin reikninga í bankanum og með samþykki foreldra eða forráðamanna fengið aðgang að netbanka eða appi til að skoða stöðu sinna reikninga. Foreldrar geta óskað eftir bæði skoðunar- og millifærsluaðgangi og þannig fylgst með fjármálum barnsins á öruggan hátt.

Þegar börn ná níu ára aldri rýmkar heimild þeirra til að tengjast bankanum. Þá geta þau, með samþykki foreldra, fengið útgefið debetkort og fengið aðgang að netbanka eða appi til að skoða stöðu sinna reikninga. Þetta er góð leið til að kynna börnum og unglingum fyrir bankaþjónustu svo þau öðlist sjálfsöryggi til þess að nýta sér þjónustuna þegar þau verða eldri.

Það er aldrei of snemmt að byrja að leggja fyrir. Fyrir þau sem vilja byggja upp langtímasparnað er hægt að stofna bundinn reikning, til dæmis Framtíðarreikning Arion banka, sem er ætlaður sparnaði frá fyrstu tíð og bundinn til 18 ára aldurs.

Besta leiðin til að kenna börnum á fjármál er að sýna þeim hvernig bankareikningar virka og hvaða áhrif það hefur á innistæðuna þegar greitt er fyrir eitthvað með korti.

Ráðgjafar okkar taka alltaf vel á móti börnum og foreldrum eða forráðamönnum þeirra og geta ráðlagt með stofnun reikninga og sparnað.