Ný hagspá: Hag­kerfi í reip­togi

Ný hagspá Arion banka sem birt er í dag gerir ráð fyrir að hagvöxtur verði 4,5% í ár, sem er nokkur lækkun frá okkar síðustu spá í maí. Stærri breyting er þó fólgin í samsetningu hagvaxtarins. Í stað eftirspurnardrifins hagvaxtar er nú útlit fyrir að utanríkisverslun, með ferðaþjónustuna fremsta í flokki, dragi vagninn í ár.

Á næsta ári hægir þó verulega á hagvexti og verður hann 1,6%. Munar miklu um áframhaldandi hægagang einkaneyslu ásamt samdrætti í fjárfestingu. Ágætar horfur í útflutningsgreinum, sem nær einnig til annarra greina en ferðaþjónustu, vega þó á móti. Við spáum að verðbólga hjaðni á næsta ári og vextir taki þá að lækka. Þá sjáum við fram á að hagkerfið taki nokkuð hratt við sér og hagvöxtur verði um og yfir 3% á ári 2025 til 2026. Þetta er meiri hagvöxtur en við höfum vanalega spáð svo langt fram í tímann en mikil fólksfjölgun á vinnualdri skapar forsendur fyrir talsverðum hagvexti, jafnvel meiri en í spánni.

Eins og ævinlega er óvissan mikil og það kristallast í yfirskriftinni „Hagkerfi í reiptogi“. Átök sterkra krafta eru óvenju sýnileg um þessar mundir. Þau eru ef til vill greinilegust í bröttu vaxtahækkanaferli Seðlabankans, sem er ætlað að slá á mikla eftirspurn og verðbólgu. Einn stærsti áhættuþátturinn næstu misseri er að neikvæð áhrif vaxtahækkana á fjárfestingu, hagvöxt og atvinnuleysi verði meiri en við reiknum með. Þrátt fyrir þá hættu er mögulegt að sigla milli skers og báru í baráttunni við verðbólgu, einkum ef aðgerðir á vinnumarkaði og í ríkisfjármálum stuðla að auknum verðstöðugleika.

Efnahagshorfur 2023-2026