10.12.2024

Vel­heppn­aður morg­un­fund­ur Arion um sjálf­bærni

Þann 28. nóvember síðastliðinn hélt Arion banki vel sóttan morgunfund um sjálfbærni í höfuðstöðvum sínum, Borgartúni 19, undir yfirskriftinni „Vaxandi kröfur & aukinn kraftur“.

Markmið fundarins var að brýna fyrirtæki til dáða í sjálfbærnimálum og varpa um leið ljósi á hert og aukið regluverk í Evrópu um sjálfbærni. Ný löggjöf snertir ekki aðeins stór fyrirtæki heldur einnig lítil og meðalstór fyrirtæki.

Hlédís Sigurðardóttir, forstöðumaður sjálfbærni Arion banka, hóf ráðstefnuna með brýningu um mikilvægi þess að virkja kraftinn í sjálfbærninni og gera sífellt betur. Einnig hvatti hún fyrirtækin til að setja sér vísindaleg loftslagsmarkmið. Hlédís hnykkti á því að hér vildum við vera til staðar fyrir viðskiptavini okkar og hjálpa þeim áfram á þessari braut.

Arnar Sveinn Harðarson, lögfræðingur hjá Arion, fjallaði um evrópska lagarammann í sjálfbærni og sýndi hvernig regluverkið snertir fyrirtæki af öllum stærðum og gerðum. Arnar beindi sjónum viðstaddra enn fremur að nauðsyn þess að lítil og meðalstjór fyrirtæki séu meðvituð um áhrifin á starfsemi þeirra og tæpti á ólíkum reglum og mælikvörðum á skýran og einfaldan hátt.

Sverrir Norland skoðaði sjálfbærnimálin í stóru samhengi og talaði þar út frá bók sinni, Stríð og kliður (2021). Hann velti fyrir sér sambandinu á milli loftslags, tækni og hugarflugs okkar mannanna.

Kristbjörg M. Kristinsdóttir hjá Stefni fræddi viðstadda um hvernig mat á frammistöðu fyrirtækja í tengslum við sjálfbærni hefur áhrif á fjárfestingarvilja. Hún benti á að fyrirtæki, sem taka sjálfbærnina föstum tökum, hafa oftar en ekki greiðari aðgang að fjármagni og standa því styrkari fótum, rekstrarlega séð.

Að endingu stýrði Hlédís svo áhugaverðu pallborði þar sem fulltrúar fjögurra ólíkra fyrirtækja mættust: Andri Guðmundsson hjá VAXA, Halldór Guðmundsson hjá Te og kaffi, Jónína Þóra Einarsdóttir hjá Steypustöðinni og Steinunn Jónsdóttir hjá Verði. Þau voru öll með mótaða og skýra sýn á sjálfbærnimálin og sammála um að sjálfbærni og góður rekstur væru einfaldlega sami hluturinn.

Deila grein:

facebookxmaillinkedin

Fleiri fréttir

Fréttayfirlit
20. nóvember 2026

Arion banki breyt­ir vöxtum óverðtryggðra íbúðalána með fasta vexti

Frá og með deginum í dag, 20. nóvember, lækka óverðtryggðir íbúðalánavextir, fastir til þriggja ára, um 0,40 prósentustig og verða 8,35%. Breytingin á aðeins við um ný lán.

Lesa meira
13. nóvember 2026

Truflun á tölvupóstþjónustu

Vegna tæknilegra truflana í þjónustu sem við nýtum hjá Microsoft eigum við í tímabundnum vandræðum með tölvupóstþjónustuna okkar. Truflanirnar kunna einnig að hafa áhrif á aðra þjónustu og kerfi.

Lesa meira
3. nóvember 2026

Arion banki ráðgjafi við sölu Fjarðarkaupa

Fyrirtækjaráðgjöf Arion banka hafði umsjón með söluferli Fjarðarkaupa fyrir hönd eigenda félagsins. Söluferlinu lauk með samningum um sölu á bæði verslunarrekstri Fjarðarkaupa til Samkaupa, dótturfélags Dranga hf., og fasteigninni að Hólshrauni 1 í Hafnarfirði, en kaupandi fasteignarinnar er fasteignafélagið Kaldalón hf. 

Lesa meira