Fjöldi sparn­að­ar­ráða fyr­ir alla fjöl­skyld­una

Sveinn Óskar Hafliðason er sölustjóri á viðskiptabankasviði Arion banka. Hann hefur mjög fjölbreytta og fróðlega nálgun á sparnað – sinn eigin, barna sinna og fjölskyldunnar í heild – og er duglegur að deila slíkum ráðum með öðrum, meðal annars í stuttum og læsilegum færslum á samfélagsmiðlinum Linkedin.

Sparar til að geta ferðast meira

Það sem helst einkennir sparnaðarnálgun Sveins Óskars er fjölbreytnin. Hann setur eggin aldrei öll í sömu körfu heldur nýtir sér frekar úrval sparnaðarreikninga og áskrifta í sjóðum. Þá er ljóst að Sveinn Óskar hrindir engri fjárhagslegri ákvörðun í framkvæmd nema að vel yfirlögðu ráði.

Hann brosir í kampinn og kveðst raunar vera þekktur innan vinahópsins fyrir að vera „leiðinlega skynsamur með peninga“. Hann bætir því þó strax við að hann eyði „pening í það sem hann elskar“, einkum í ferðalög hans og fjölskyldunnar.

„Ástríða mín fyrir sparnaði skýrist meðal annars af því að þá getum við ferðast meira. Það munar ansi miklu hvort þú safnar almennilega fyrir ferðalaginu eða tekur það út á kreditkortinu og greiðir það upp næstu sex mánuði á eftir.“

Er með marga sparnaðarreikninga með ólíkum markmiðum

Sveinn Óskar kveðst vera með marga ólíka sparnaðarreikninga sem hver og einn hafi mismunandi markmið; þar séu meðal annars reikningar með sparnaði fyrir ferðalög.

Auðvelt sé að gefa sparnaðarreikningunum ný og lýsandi heiti í Arion appinu; einn heiti til dæmis Bílskúr („Ég er að byggja bílskúr í Laugardalnum heima í Reykjavík“), annar Rúm („Ég vissi að ég þyrfti að kaupa nýtt rúm á næstu árum“), enn annar heiti Brúðkaup („Við trúlofuðum okkur fyrir mörgum árum en eigum alltaf eftir að slá upp veislu aldarinnar!“).

„Það kostar ekkert að stofna nýja sparnaðarreikninga. Með því að spara markvisst á mörgum ólíkum reikningum – og setja bara lágar fjárhæðir reglulega inn á hvern þeirra – á ég frekar fyrir hlutunum þegar að útgjöldunum kemur.“

Dreifir áhættunni með nokkrum sjóðaáskriftum

Sveinn Óskar nálgast áskriftir í sjóðum á ekki ósvipaðan hátt og sparnað á innlánsreikningum.

„Ég er hrifinn af því að vera í áskrift hjá nokkrum sjóðum með lága fjárhæð á hverjum stað,“ segir hann. „Hlutabréfamarkaðir eru auðvitað undirseldir margvíslegum ytri áhrifum, sem enginn getur séð fullkomlega fyrir, og þess vegna er ég með lágar upphæðir í áskrift í nokkrum ólíkum sjóðum – frá 5000 upp í 15000 krónum en aldrei meira.“

„Sá sparnaður hefur vaxið ágætlega,“ bætir hann við. „ „Og þetta er aðgengilegra en fólk heldur. Í flestum tilvikum geturðu fengið peninginn greiddan út innan tveggja virkra daga.“

Er með þrjár sparnaðarleiðir fyrir börnin

Sveinn Óskar nálgast sparnað barnanna sinna sömuleiðis á mjög markvissan hátt. Hann á fimm ára stelpu og níu ára strák og er með þrjár sparnaðarleiðir fyrir hvort þeirra.

Í fyrsta lagi er það hefðbundinn verðtryggður reikningur í nafni barnsins.

„Þar heldur peningurinn verðgildi sínu á reikningi sem er lokaður til langs tíma, eða fram að átján ára aldri þeirra, og þau eiga upphæðina.“

Í öðru lagi er það verðtryggður reikningur í nafni Sveins Óskars sem hann hyggst nota til að hjálpa þeim að kaupa sér fasteign.

„Ég veit auðvitað ekkert hvar þau verða stödd í lífinu þegar þau verða fjárráða. En ég vil geta hjálpað þeim ef þau þurfa og þá stýrt því sjálfur hvernig ég geri það; þess vegna er reikningurinn í mínu nafni. Ég vil sannarlega ekki ala upp einhver bómullarbörn sem fá allt upp í hendurnar án þess að hafa neitt fyrir því. En ég vil líka geta stutt þétt við bakið á þeim.“

Í þriðja lagi er það svo áskrift í verðbréfasjóði í nafni barnanna.

„Sagan sýnir einfaldlega að sparnaður til tíu ára eða lengur í verðbréfasjóðum skilar að jafnaði betri ávöxtun en verðtryggður reikningur.“

Sveinn Óskar tekur fram að ekki sé um háar fjárhæðir að ræða enda mögulegt að hafa reglubundinn sparnað inn á framtíðarreikninga eins lágan og fólki hentar og sömuleiðis megi vera í áskrift í verðbréfasjóðum Stefnis fyrir lága mánaðarlega upphæð. Sparnaður af þessu tagi ætti því að vera flestum aðgengilegur.

Kennir börnunum fjármálalæsi um leið

Sveinn Óskar bætir því við að eins konar hliðarverkun af því að fjárfesta í sjóðum fyrir börnin geri þau meðvituð um hvernig fjármál virka, að því gefnu að hann fræði þau um hlutina.

„Mér finnst gaman að útskýra fyrir þeim að þau eigi hlut í Bónus, sem er hlutafélag, þegar við förum þangað til að kaupa í matinn. Krökkunum finnst það skemmtilegt og ég held að grunnskilningur á fjármálum sé jafnvel meira virði en sjálfur peningurinn sem þau eignast, til langtíma litið. Fjármálalæsið.“

Fimmtíu prósent sparnaðarregla

Að lokum segir Sveinn Óskar að þau Tanja kona hans hafi í heiðri ófrjávíkjanlega reglu varðandi peningagjafir til barnanna.

„Þegar krakkarnir fá til dæmis afmælis- eða jólapening hef ég alltaf tekið helminginn og sett í sparnað. Helmingurinn fer sem sagt alltaf í bankann. Þar með læra þau að 50% fer í sparnað. Ef þau fá 100 evrur að gjöf hugsa þau núorðið sjálfkrafa: Vá hvað get ég gert skemmtilegt fyrir 50 evrur!“

Þannig temji þau þeim góðar sparnaðarvenjur strax frá unga aldri.