All­ar hetj­urnar í einni aug­lýsingu

Við Íslendingar erum orðin góðu vön þegar kemur að stórmótum og íslenska karlalandsliðinu í handbolta og það hefur nánast verið hægt að ganga að því vísu síðustu ár að þjóðin hefur getað fylgst með handboltastrákunum okkar og hvatt þá áfram á stórmóti í janúar á hverju ári.

Það verður engin breyting þar á í byrjun næsta árs en það sem gerir veisluna sem í vændum er enn skemmtilegri er sú staðreynd að íslenska kvennalandsliðið í handbolta tekur nú í nóvember þátt á HM í handbolta í fyrsta skiptið í 11 ár.

Þegar Arion lagði upp í þá vegferð að gera auglýsingar fyrir mótin sem einn af helstu styrktaraðilum HSÍ, lá beinast við að gera eina auglýsingu með báðum liðum í stað þess að gera tvær ólíkar auglýsingar. Viggó Jónsson, hugmyndasmiður auglýsingarinnar hafði þetta að segja um uppruna hugmyndarinnar.

Við vildum leggja landsliðin okkar bæði að jöfnu og hampa árangri þeirra beggja í einni auglýsingu. Það er virkilega gaman að fá að hvetja bæði landsliðin okkar áfram á stórmótum og með þessari auglýsingu vildum við einnig beina sjónum landsmanna að því að kvennalandsliðið okkar hefur verið í miklum vexti og framtíðin er björt í íslenskum handbolta, hvort sem er í kvenna- eða karlaboltanum. Við viljum leggja okkar að mörkum við að útrýma mismun í áhorfi og hvatningu íslenskra kvenna- og karlalandsliða.

Í auglýsingunni fá landsmenn að fylgjast með hetjunum úr landsliðunum tveimur skipta sér í lið þvert á kyn og keppa í handbolta. Kappið og leikgleðin skín í gegn og það fer ekkert á milli mála að þetta framúrskarandi íþróttafólk okkar hefur komist í fremstu röð, með dugnaði og elju en ekki síst með leikgleði og ástríðu.

Áfram Ísland!