Arion banki fékk eftir­sókn­ar­verð verð­laun fyrir hrað­þjónustu­her­ferð

Arion banki var sigurvegari Íslensku árangursverðlaunanna sem afhent voru þann 4. mars á ÍMARK hátíðinni.

Árangursverðlaununum er ætlað að beina sjónum að herferðum sem skilað hafa framúrskarandi árangri en það eru stjórnir ÍMARK og SÍA sem veita verðlaunin. Bankinn fékk verðlaunin fyrir auglýsingaherferð þar sem kostir hraðþjónustu bankans, sem byggist fyrst og fremst á nýrri kynslóð hraðbanka, netbanka og appi, voru kynntir.

Birna Rún Gísladóttir frá markaðsdeild bankans og Elín Helga Sveinbjörnsdóttir frá Hvíta húsinu tóku á móti verðlaununum og voru með erindi um herferðina og þann góða árangur sem náðst hefur innan Arion banka við kynningu hraðþjónustunnar.

Birna Rún Gísladóttir, markaðsdeild Arion banka:

„Við erum afar stolt af þessum verðlaunum, Árangursríkasta auglýsingaherferð ársins 2015, enda teljum við þau vera eftirsóknarverðustu verðlaunin sem veitt eru til markaðsfólks á hverju ári. Verðlaunin eru einnig mikil hvatning fyrir það starf sem við höfum unnið með Hvíta húsinu. Markmið herferðarinnar var að auka notkun á hraðþjónustuleiðum bankans og breyta hegðun viðskiptavina og einfalda þeim þannig aðgengi að þjónustu bankans. Með því sköpum við virði fyrir viðskiptavininn en það er það sem við erum að leggja áherslu á alla daga. Markaðsstarf er fjárfesting og eins og með aðrar fjárfestingar þá viljum við ávaxta hana ríkulega. En auðvitað var það þannig að allir starfsmenn komu að þessari herferð með einum eða öðrum hætti, sérstaklega starfsfólk í útibúunum. Þessi markaðsherferð var fyrst og fremst að styðja við langtímamarkmið bankans varðandi þjónustuleiðir og því var starfsfólk í framlínu í lykilhlutverki í herferðinni. Þessi verðlaun eru merki um að vel hafi tekist til og fyrir það erum við afar þakklát.“