01.04.2016
Mikil aukning umsókna í Startup Reykjavík
Alls bárust 247 umsóknir um þátttöku í viðskiptahraðlinum Startup Reykjavík sem fram mun fara í sumar. Verður þetta fimmta sumarið sem viðskiptahraðallinn fer fram á vegum Arion banka og Icelandic Startups. Um er að ræða 76% aukningu í umsóknum frá síðasta ári, en umsóknarfrestur rann út í gær, 31. mars. Startup Reykjavík var valinn besti viðskiptahraðall Norðurlanda árið 2015.
Startup Reykjavík fór fyrst fram árið 2012 og árlega hafa 10 félög tekið þátt og þróað sínar viðskiptahugmyndir. Með þátttöku í Startup Reykjavík fá félögin aðstöðu í 10 vikur sem þau deila með hinum teymunum sem þátt taka. Einnig njóta þau leiðsagnar fjölda reyndra mentora sem deila sinni þekkingu og reynslu. Að auki þá fjárfestir Arion banki í félögunum sem taka þátt í Startup Reykjavík fyrir 2,4 milljónir króna gegn 6% eignarhlut. Alls hafa 40 félög farið í gegnum Startup Reykjavík viðskiptahraðalinn.
Einar Gunnar Guðmundsson, forsvarsmaður nýsköpunar hjá Arion banka:
„Ég held að aukninguna í ár megi skýra með ýmsu móti. Í fyrsta lagi voru óvenju fáar umsóknir í fyrra miðað við árin á undan. Hins vegar liggur skýringin í því að nýsköpunarumhverfið á Íslandi hefur eflst til mikilla muna á undanförnum árum og ekki síst á árinu 2015. Það eru fleiri viðburðir sem tengjast nýsköpun og fleiri vettvangar fyrir frumkvöðla til að koma saman og sinna sínum verkefnum í skapandi umhverfi. Einnig hafa fjölmiðlar sinnt þessum málaflokki óvenju vel og síðast en ekki síst þá eru í dag fjórir öflugir fjárfestingasjóðir sem leggja áherslu á nýsköpun. Það skilar sér meðal annars í því að sprotafyrirtæki, sem mörg hver hafa tekið þátt í Startup Reykjavík, hafa sótt sér fjármögnun á undanförnum mánuðum. Allt skiptir þetta máli við að skapa hér á landi frjóan jarðveg fyrir frumkvöðla og ung fyrirtæki sem horfa ekki síður á tækifæri á alþjóðavísu en á Íslandi.“
Startup Reykjavík er í eigu Arion banka en umsjón viðskiptahraðalsins er í höndum Icelandic Startups.
Meðfylgjandi eru myndir af tveimur af þeim 40 teymum sem farið hafa í gegnum Startup Reykjavík á undanförnum árum, Eskitech og Mure.
Eskitech
Mure
Deila grein:
