Jökull ráðinn forstöðumaður mannauðs hjá Arion banka

Jökull H. Úlfsson hefur verið ráðinn forstöðumaður mannauðs hjá Arion banka. Um er að ræða nýja deild innan bankans, sem heyrir beint undir bankastjóra, þar sem saman koma starfsmannaþjónusta og straumlínustjórnunarteymi bankans. Hlutverk mannauðsdeildar verður að viðhalda þeim góða árangri sem þegar hefur náðst, jafnframt því að styðja við jákvæðar breytingar í fyrirtækjamenningu bankans með áherslu á stöðugar umbætur í starfseminni.

Jökull hefur víðtæka reynslu úr fjármálageiranum. Hann hefur starfað hjá Arion banka og forverum hans frá árinu 2002, nú síðast frá árinu 2012 sem forstöðumaður straumlínustjórnunar á þróunar- og markaðssviði, þar sem hann veitti forystu teymi sérfræðinga við innleiðingu straumlínustjórnunar.

Áður var Jökull forstöðumaður í eignastýringu bankans. Hann er viðskiptafræðingur að mennt en hefur auk þess lokið prófi í verðbréfaviðskiptum. Eiginkona Jökuls er Guðrún Valborg Björgvinsdóttir og saman eiga þau þrjú börn.