Arion banki opnar gjaldeyrishraðbanka í Kringlunni

Í síðustu viku setti Arion banki upp nýjan hraðbanka í útibúi sínu í Kringlunni. Hraðbankinn afgreiðir algengustu erlendu myntir, þ.e. evrur, pund, dollara og danskar krónur. Gengið í gjaldeyrishraðbankanum er það sama og hjá gjaldkerum í öðrum útibúum bankans.

Þessi nýjung er liður í endurhönnun útibús bankans í Kringlunni en sem dæmi fer öll afgreiðsla seðla og gjaldeyris í útibúinu nú fram í gegnum hraðbanka. Starfsfólk veitir viðskiptavinum að sjálfsögðu áfram alla þá aðstoð sem þeir þurfa, hvort sem það er að sækja greiðslukort, fá ráðgjöf vegna sparnaðar eða leggja inn eða taka út pening.

Fyrstu viðbrögð við nýja gjaldeyrishraðbankanum hafa verið mjög jákvæð. Áður er reynslan af gjaldeyrishraðbönkum afar góð en bankinn starfrækir fjölmarga slíka á Keflavíkurflugvelli og því koma þessi fyrstu viðbrögð ekki á óvart.

Gjaldeyrishraðbankinn er liður í þeirri þróun sem er að eiga sér stað í fjármálaþjónustu um allan heim þar sem aðgengi að fjármálaþjónustu eykst jafnt og þétt, ekki síst með tilkomu netbanka, apps og öflugri hraðbanka.