Gjaldkerarnir okkar

Við höfum fengið nokkuð sterk viðbrögð við fréttum af hugsanlegri gjaldtöku vegna þjónustu gjaldkera. Það er gott að finna að viðskiptavinir okkar kunni að meta gjaldkerana okkar og þá þjónustu sem þeir veita.

Rétt er að taka fram að engar hækkanir vegna þjónustu gjaldkera eru að fara af stað á næstu dögum eða vikum. Hins vegar er það rétt sem kom fram í fjölmiðlum að unnið er að endurskoðun á tilteknum þáttum í gjaldskrá bankans, þar með talið þjónustu gjaldkera. 

Í þessari vinnu horfum til þess að öll gjaldtaka sé sanngjörn, gegnsæ og valkvæð. Sanngjörn þannig að þeir greiði fyrir þjónustuna sem nýta hana – ekki aðrir. Gegnsæ þannig að viðskiptavinum sé ljóst hvað hver þjónustuþáttur kostar. Og valkvæð þannig að viðskiptavinir okkar geti einnig valið að nýta sér aðrar þjónustuleiðir s.s. appið, netbankann eða hraðbanka í stað þess að greiða gjald fyrir þjónustu gjaldkera. Einnig höfum við í huga sérstöðu tiltekinna hópa, s.s. eldri borgara.

Viðbrögð okkar viðskiptavina síðustu daga hafa ekki farið framhjá okkur og munum við taka tillit til þeirra við endurskoðun á gjaldskrá bankans.