Arion banki styrkir Krabbameinsfélag Íslands um eina milljón króna

Í tilefni af bleikum október afhenti Arion banki í dag Krabbameinsfélagi Íslands eina milljón króna í styrk. Helga Halldórsdóttir, forstöðumaður mannauðs hjá Arion banka, afhenti Helga Björnssyni, fjármálastjóra Krabbameinsfélagsins, styrkinn. Arion banki hefur um langt árabil stutt við starf Krabbameinsfélagsins og að vanda eru í ár bleikir fánar að húni víða fyrir framan starfsstöðvar bankans í október.

Október er mánuður árvekni- og fjáröflunarátaks Krabbameinsfélags Íslands og í ár er það undir slagorðinu ,,Þú ert ekki ein“. Lögð er áhersla á mikilvægi stuðnings og vináttu þegar kona greinist með krabbamein, þegar tilveran breytist snögglega og við tekur tími sem getur reynst afar erfiður. Stuðningur fjölskyldu og vina skiptir miklu máli í öllu ferlinu, allt frá greiningu, en einnig faglegur og félagslegur stuðningur sem Krabbameinsfélagið veitir endurgjaldslaust.