Ráðstefna í Hörpu um þróun þjóða út frá samfélagslegum þáttum

Arion banki er styrktaraðili ráðstefnu sem fram fer í Hörpu í dag undir yfirskriftinni Social Progress – What works?

Ísland er mjög ofarlega á lista yfir þær 133 þjóðir þar sem hin svokallaða SPI vísitala er mæld eða í 4. sæti. Vísitalan er nýlegur alþjóðlegur mælikvarði á þróun þjóða þar sem eingöngu er tekið tillit til samfélagslegra þátta, svo sem öryggi borgara, heilsu, umhverfismál og tækifæri einstaklinga, en ekki hagrænna þátta eins og almennt gerist þegar verið er að meta frammistöðu ríkja.

Michael Porter, hagfræðingur og prófessor við Harvard Business School, er einn af upphafsmönnum þessa nýja mælikvarða og verður hann einn af lykilfyrirlesurum dagsins. Rakel Óttarsdóttir, framkvæmdastjóri rekstrarsviðs Arion banka, verður meðal fyrirlesara en erindið hennar, ,,Saman látum við góða hluti gerast“, fjallar um velgengni Íslands hvað varðar þróun samfélagsins.
Þá mun Michael Green, ritstjóri og forstöðumaður Social Progress Imperative á heimsvísu, vera með erindi, ásamt þeim Matthew Bishop, ritstjóra alþjóðamála hjá The Economist og Mörthu Minow, deildarforseta lagadeildar Harvard háskóla, auk fjölda annarra þekktra vísinda- og fræðimanna á sviði samkeppnishæfi þjóða og stefnumótunar fyrirtækja.