Nolan Williams kennir á námskeiði um mútur í alþjóðlegum viðskiptum og skyldur endurskoðenda

Atvinnuvega- og nýsköpunarráðuneytið í samstarfi við Félag löggiltra endurskoðenda stendur fyrir námskeiði um mútur og spillingu í alþjóðlegum viðskiptum og skyldur endurskoðenda í að upplýsa um brot af því tagi. Á námskeiðinu verður fjallað um samning OECD um baráttu gegn mútugreiðslum til opinberra starfsmanna þvert á landamæri. Sérstaklega verður fjallað um hlutverk og ábyrgð endurskoðenda og fyrirtækja út frá góðum stjórnarháttum. Nánari upplýsingar má finna hér.

Nolan Williams, sérfræðingur í rekstraráhættu hjá Arion banka verður einn af aðal leiðbeinendum á námskeiðinu, ásamt Helgu Hlín Hákonardóttur, lögmanni og ráðgjafa hjá Strategíu og Sveini Helgasyni, sérfræðingi hjá innanríkisráðuneytinu.

Námskeiðið er þátttakendum að kostnaðarlausu og verður haldið í húsnæði atvinnuvega- og nýsköpunarráðuneytisins, Skúlagötu 4, Reykjavík 24. nóvember, kl. 8.30-12.00. Skráning er til kl. 15.00, 23. nóvember.