Marriott Edition hótel mun rísa við Hörpu

Í gær var skrifað undir samninga um kaup bandaríska fasteignafélagsins Carpenter & Company á hótelreitnum við Hörpu. Kolufell ehf. er seljandi lóðarinnar en Arion banki á 70% í félaginu, aðrir eigendur eru Mannvit og Tark. Carpenter og Company hefur mikla reynslu af hótelverkefnum í Norður Ameríku og samstarfi við alþjóðlegar hótelkeðjur.

Jafnframt var undirritaður samningur við Marriott Edition hótelkeðjuna um rekstur fimm stjörnu, 250 herbergja hótels á reitnum.

Arion banki hefur gegnt mikilvægu hlutverki í þessu verkefni og kemur að ýmsum hliðum þess. Arion banki hefur unnið að skipulagi fjármögnunar verkefnisins og lánsfjármögnun og átti frumkvæði að aðkomu Eggerts Dagbjartssonar og bandaríska fasteignafélagsins Carpenter & Company.

Höskuldur H. Ólafsson, bankastjóri Arion banka:
„Við höfum lagt ríka áherslu á að fá að þessu verkefni hæfa og reynda aðila og fundum þá í Carpenter & Company og Eggerti Dagbjartssyni sem koma að borðinu með mikla reynslu af hótelverkefnum í Norður Ameriku í samstarfi við alþjóðlegar hótelkeðjur. Samningur við Marriott Edition um rekstur fimm stjörnu hótels á Hörpureitnum sýnir að verkefnið er komið í góðan farveg. Það er mikilvægt að á þessum góða stað í höfuðborginni verði að öllu leyti vel að verki staðið og höfum við fundið til ábyrgðar hvað það varðar. Því er mjög ánægjulegt að þessum áfanga sé náð.“