Fasteignaskýrsla Greiningardeildar Arion banka 2014: Bóla eða bjartar horfur?

Greiningardeild Arion banka stóð fyrir morgunfundi 3. desember þar sem helstu niðurstöður nýrrar fasteignaskýrslu deildarinnar voru kynntar. Skýrslan ber heitið: Bóla eða bjartar horfur? Höskuldur H. Ólafsson, bankastjóri Arion banka, opnaði fundinn en Regína Bjarnadóttir, forstöðumaður greiningardeildar, og Anna Hrefna Ingimundardóttir, hagfræðingur í greiningardeild, fluttu erindi.

Íbúðafjárfesting er að taka við sér á ný eftir mikið frost í kjölfar fjármálakreppunnar og hafa margir velt því fyrir sér hvort verið sé að blása í nýja bólu á fasteignamarkaði. Þótt miklar verðhækkanir hafi átt sér stað á síðasta ári telur greiningardeild bankans svo ekki vera, enda hafa verðhækkanir á fasteignamarkaði nokkurn veginn fylgt umsvifum í hagkerfinu. Einnig er byggingarkostnaður enn nokkuð hár í samanburði við fasteignaverð. 

Greiningardeild Arion banka spáir 7-8% nafnhækkun fasteignaverðs á ársgrundvelli á árunum 2015-2016, en að smám saman hægi á og að árshækkunin muni nema 6-7% á árinu 2017.

Á fundi greiningardeildar var einnig fjallað um horfur á leigumarkaði og bar erindið yfirskriftina: Er leigumarkaðurinn að mettast? Greiningardeild Arion banka telur að teikn séu á lofti um að svo sé, en hlutfall heimila á leigumarkaði lækkaði árið 2013 í fyrsta sinn frá árinu 2007. Eftirspurn aðþrengdustu hópanna fjárhagslega, fólks á aldrinum 25-34 sem og tekjulægstu 20%, virðist vera að minnka. Mælikvarðar á framtíðareftirspurn gefa einnig til kynna að eftirspurn sé að fara minnkandi, enda hafa verðhækkanir verið töluverðar undanfarin ár.

Glærur sem fyrirlesarar studdust við má sjá með því að smella á hlekkina:

Bóla eða bjartar horfur? – Regína Bjarnadóttir, forstöðumaður greiningardeildar
Er leigumarkaðurinn að mettast? – Anna Hrefna Ingimundardóttir, hagfræðingur í greiningardeild

Skýrsluna í heild má nálgast hér: Fasteignaskýrsla Greiningardeildar Arion banka 2014.